మీ పౌరుషం ప్రత్యేకహదా తేవడంపై చూపండి.. నాపై కాదు: పవన్

Posted: 07/08/2015 03:11 PM IST

సినీనటుడు, జనసేన అధ్యక్షుడు పవన్ కల్యాన్ మరోమారు ఆంధ్రప్రదేశ్ టీడీపీ ఎంపీలపై తనదైన శైలిలో స్పందించారు. టీడీపీ ఎంపీలు తనపై చేసిన విమర్శలపై ఆయన మరోమారు సామాజిక మాధ్యమం ట్విట్టర్ ద్వారా ప్రశ్నించారు. తెలుగుదేశం ఎంపీలు వ్యాపారం చేయడం తప్పు కాదని అంటూనే.. ప్రజాప్రతినిధులుగా పార్లమెంటులో అడుగుపెట్టిన ఎంపీలు.. వ్యాపారాలు మాత్రమే చేసుకోవడం.. ప్రజా సమస్యలను పక్కన బెట్టడం తప్పుగా పేర్కోన్నారు. రాష్ట్రానికి ప్రత్యేక హోదా తీసుకురావాలన్న తన వ్యాఖ్యల వెనుకనున్న ఉద్దేశ్యాన్ని మరచి.. తనను విమర్శించడం మంచికాదన్నారు.

రాష్ట్ర హితం కోసం, భావితరాలు, బంగారు భవిష్యత్తు కోసం ప్రత్యేక హోదా కోసం ఎంపీలు పాటుపడాలన్నారు. తనపై విమర్శలు చేసేందుకు తెలుగుదేశం పార్టీ ఎంపీలు చూపిన శ్రద్ద.. ప్రత్యేక హోదా కోసం చూపిస్తే బాగుంటుందని సూచించారు. తనను తిడితే రాష్ట్రానికి ప్రత్యేక హోదా రాదని అన్నారు. సీమాంధ్ర ఎంపీలు తమ పౌరుషాన్ని తనపై కాకుండా కేంద్ర వద్ద చూపితే.. రాష్ట్రానికి ప్రత్యేక హోదా సాకరమవుతుందని పేర్కోన్నారు. అంతకుముందు చేసిన ట్విట్ లో రాష్ట్ర హితం కోసం తాను కోర్టులకైనా, జైలుకైనా వెళ్లేందుకు సిద్దమన్నారు. అయితే అందుకు తగ్గ ఏర్పాట్లు ఎంత త్వరగా చేస్తే అంత మంచిదని పవన్ అన్నారు.

జి. మనోహర్