:ఫోన్ ట్యాపింగ్ జరిగిందని అంగీకరించిన టెలికామ్ సంస్థలు..

Posted: 06/23/2015 10:01 PM IST

ఫోన్‌ ట్యాపింగ్‌ వ్యవహారంపై ఏపీ సిట్‌ సర్వీస్‌ ప్రొవైడర్లతో జరిపిన విచారణ పూర్తి అయింది. ఫోన్‌ ట్యాపింగ్‌ జరిగినట్లు సర్వీస్‌ ప్రొవైడర్లు అంగీకరించారు. అయితే సాంకేతికపరమైన అంశాలు ఇప్పటికిప్పుడే చెప్పలేమని, కాల్‌డేటా ఇవ్వడానికి కొంత సమయం కావాలని ప్రొవైడర్లు కోరారు. దీంతో మళ్లీ విచారణకు పిలిచినప్పుడు అందుబాటులో ఉండాలని ప్రొవైడర్లను సిట్‌ అధికారులు ఆదేశించారు. యూనినార్‌, ఎయిటెల్‌, ఐడియా, డొకోమో, వోడా, రిలయన్స్‌ కంపెనీల ప్రతినిధులను సిట్‌ అధికారులు విచారించారు. ఆపరేషన్‌, టెక్నికల్‌, లీగల్‌ అధికారులతో కలిసి సర్వీస్‌ ప్రొవైడర్లు సిట్‌ అధికారుల ఎదుట హాజరయ్యారు.
 
ఏపీ జలవనరుల శాఖ మంత్రి దేవినేని ఉమా టెలిఫోన్‌ ట్యాపింగ్‌ వివాదానికి సంబంధించి విజయవాడలోని భవానీపురం పోలీస్‌ స్టేషన్‌లో ఫిర్యాదు చేసిన విషయం తెలిసిందే. ట్యాయ్‌ నిబంధనలు, టెలిఫోన్‌ ట్యాపింగ్‌కు విరుద్ధంగా తెలంగాణ ప్రభుత్వం ఆంధ్రప్రదేశ్‌కు చెందిన కొంతమంది ఐఏఎస్‌, ఐపీఎస్‌ అధికారులతో పాటు ప్రభుత్వంలో ఉన్న కొంత మంది కీలక మంత్రులు, సీఎం చంద్రబాబు నాయుడు వద్ద పనిచేస్తున్న సిబ్బందికి సంబంధించి ఫోన్‌ ట్యాపింగ్‌ జరిగిందని, దీనిపై సమగ్ర విచారణ జరపాలని మంత్రి ఉమ ఇచ్చిన ఫిర్యాదు మేరకు ఈ కేసు దర్యాప్తు ప్రారంభమైంది.

జి. మనోహర్