తలసానీ.. నీకు తలనొప్పి తప్పలేదు

Posted: 05/25/2015 11:40 AM IST

టైటిల్ చూడగానే పాపం ఆయనకు నిజంగా తలనొప్పిగా ఉందేమో..? జండూ బామ్ ఇద్దాం అనుకుంటున్నారేమో..? అలా అనుకుంటే మాత్రం తప్పు తప్పు. అసలు విషయం ఏంటీ అంటే తెలుగుదేశం పార్టీ నుండి టిఆర్ఎస్ పార్టీకి మారిన తలసాని శ్రీనివాస్ యాదవ్ ను టిడిపి నాయకులు మాత్రం వదలడం లేదు. తమ పార్టీ టికెట్టు మీద గెలిచి టిఆర్ఎస్ పార్టీ నుండి మంత్రి పవది పొందడంతో టిడిపి నాయకులు మండిపడుతున్నారు. అందుకే అసెంబ్లీ సమావేశాల సందర్భంగా టిడిపి వాళ్లు కేసీఆర్ ప్రభుత్వాన్ని, మండలి చైర్మెన్ ను నిలదీసినా ఎలాంటి ప్రయోజనం లేకుండా పోయింది. తాజాగా తలసాని శ్రీనివాస్ తో పాటు మరో ఇద్దరిపై టిడిపి వారు న్యాయపోరాటానికి సిద్దమవుతున్నారు.

ఫిరాయింపు ఎమ్మెల్యేలపై తెలంగాణ టీడీపీ న్యాయపోరాటానికి దిగింది. ఎమెల్మీ ఎన్నికల నేపథ్యంలో తలసాని, తీగల కృష్ణారెడ్డి, చల్లాధర్మారెడ్డిలను ఓటింగ్‌కు అనర్హులుగా ప్రకటించాలని హైకోర్టులో సోమవారం హౌస్‌మోషన్‌ పిటిషన్‌ను దాఖలు చేసింది. తలసానితో మంత్రిగా ప్రమాణస్వీకారం చేయించడమే ఫిరాయింపునకు సాక్ష్యమని కోర్టుకు టీడీపీ వివరించింది. నాలుగు నెలల క్రితమే వీరిని అనర్హులుగా ప్రకటించాలని టీడీపీ కోర్టులో పిటిషన్‌ దాఖలు చేసిన విషయం తెలిసిందే. కాగా ఈ పిటిషన్‌ను సింగిల్‌ బెంచ్‌లో కొట్టివేయగా, డివిజనల్‌ బెంచ్‌ను ఆశ్రయించింది. దీంతో పిటిషన్‌ను స్వీకరించిన హైకోర్టు పార్టీ ఫిరాయింపులకు పాల్పడిన అందరికీ నోటీసులు జారీ చేసింది. అయితే దీనిపై ఇప్పటి వరకు ఎలాంటి కథలికలు లేకపోవడం ఇప్పుడు ఎమ్మెల్సీ ఎన్నికలు వస్తుండటంతో టీడీపీ వేగంగా పావులు కదుపుతోంది. ఎట్టిపరిస్థితుల్లోనూ ఈ ముగ్గిరిని ఓటుకు దూరంగా ఉంచాలనే ఆలోచనతో అన్ని అవకాశాలను టీడీపీ పరిశీలిస్తున్నట్లు తెలుస్తోంది. ఇదివరకే వారికి నోటీసులు ఇచ్చిన నేపథ్యంలో ఆ ముగ్గురిని ఓటింగ్‌కు అనర్హులుగా ప్రకటించాలని హౌస్‌మోషన్‌లో కోరినట్లు తెలుస్తోంది.

*అభినవచారి*