కాబూల్ లో కాల్పులు.. ఘటనలో భారతీయులు మృతి

Posted: 05/14/2015 08:17 AM IST

పాకిస్థాన్ నగరం కరాచీలో తాలిబన్ ఉగ్రవాదులు ఒక్కసారిగా ఓ బస్సుపై మూకుమ్మడి దాడిచేసి 47 మందిని పొట్టనబెట్టుకున్న సంఘటన మరువకముందే ఆప్ఘన్ లో మరో దారుణంగా చోటు చేసుకుంది. ఆప్ఘనిస్థాన్ రాజధాని కాబూల్ లోని ఓ హోటల్లో సాయుధులు తెగబడ్డారు. విదేశీయుల అతిథి గృహమైన ఆ హోటల్లోకి ఉగ్రవాదులు చొరబడి విచక్షణా రహితంగా కాల్పులకు పాల్పడ్డారు. ఈ సంఘటనలో ఇద్దరు భారతీయులు సహా మొత్తం 9 మంది ప్రాణాలు కోల్పోయారు.

‘పార్క్ ప్యాలెస్ హోటల్’ అనే భవనాన్ని ఆ ఉగ్రవాదులు లక్ష్యంగా చేసుకొని దాడికి పాల్పడ్డారు. ఈ హోటల్లో సాయుధుల చెరలో చాలామంది ఉన్నారు. వీరిలో ఎక్కువమంది భారతీయులు, ఇతర దేశీయులే ఉన్నారు. ఈ ఘటనకు సంబంధించి పూర్తి వివరాలు ఇంకా తెలియాల్సి వుంది. మరోవైపు ఈ ఘటన చోటుచేసుకున్న సందర్భంగా ప్రధాని నరేంద్ర మోదీ అందరి క్షేమం ఆకాంక్షించారు. సాయుధుల చెరలో వున్నవారికి ఎలాంటి హాని జరగకుండా సురక్షితంగా బయటపడాలని మనస్ఫూర్తిగా కోరుకుంటున్నట్లు ఆయన తెలిపారు. ప్రస్తుతం మోడీ చైనా పర్యటనలో బిజీగా వున్నారు.