కాంగ్రెస్ కు సపోర్ట్ చెయ్యడం తప్పే: మోదీ

Posted: 05/12/2015 08:36 AM IST

Pm narendra modi attacked on congress party

కాంగ్రెస్ నేతృత్వంలోని గత యుపిఎ ప్రభుత్వం భూసేకరణ చట్టాన్ని హడావుడిగా ఆమోదించిందని ప్రధాన మంత్రి నరేంద్ర మోదీ తీవ్రస్థాయిలో ధ్వజమెత్తారు. ప్రస్తుతం ఎన్‌డిఎ ప్రభుత్వం తీసుకువచ్చిన భూసేకరణ బిల్లుపై పార్లమెంట్‌లో వివాదం కొనసాగుతున్న తరుణంలో ఆయన ఈ విమర్శ చేశారు. అప్పట్లో భూసేకరణ చట్టానికి మద్దతు తెలిపి బిజెపి కూడా తప్పు చేసిందని మోదీ అంగీకరించారు. భూసేకరణ చట్టానికి సంబంధించిన చరిత్రను ప్రతి ఒక్కరూ తెలుసుకోవాల్సిన అవసరం ఉంది. 120 ఏళ్ల తర్వాత గుర్తుకు వచ్చిన ఈ బిల్లును పరిశీలించేందుకు గత యుపిఎ ప్రభుత్వం కనీసం 120 గంటల సమయాన్ని కూడా వెచ్చించలేదు. అందుకు కేవలం కాంగ్రెస్ పార్టీ మాత్రమే బాధ్యురాలు కాదు. అప్పట్లో ఈ బిల్లుకు మద్దతు తెలిపి బిజెపి కూడా తప్పు చేసింది అని మోదీ పేర్కొన్నారు.

ఎన్నికలు సమీపిస్తుండటం, పార్లమెంట్ సమావేశాలను ముగించాల్సి ఉండటంతో భూసేకరణ చట్టాన్ని ఆమోదించాలని కాంగ్రెస్ నేతృత్వంలోని గత యుపిఎ ప్రభుత్వం హడావుడిగా నిర్ణయం తీసుకుందని, ఈ చట్టం పెద్ద సమస్యగా పరిణమించినట్లు అన్ని రాష్ట్రాలు ఆ తర్వాతే గుర్తించాయని మోదీ అన్నారు. కేంద్రంలో తాను ప్రభుత్వాన్ని ఏర్పాటు చేసిన తర్వాత ఈ బిల్లును సవరించాల్సిన అవసరం ఉందని అన్ని రాష్ట్రాల ముఖ్యమంత్రులు తనకు తెలియజేశారని, ఇందుకు సంబంధించి వారు రాసిన లేఖలు కూడా తనవద్ద ఉన్నాయని, లేకపోతే తాము ఈ చట్టం జోలికి వెళ్లి ఉండేవారం కాదని దైనిక్ జాగరణ్ పత్రికకు ఇచ్చిన ఇంటర్వ్యూలో మోదీ స్పష్టం చేశారు.

*అభినవచారి*