పవన్ గారు.. ప్రత్యేక హోదా కోసం ప్రశ్నించరూ..!

Posted: 05/03/2015 05:58 PM IST

Hero shivaji indefinite fasting starts at guntur collector office

ఆంధ్రప్రదేశ్‌కు ప్రత్యేక హోదా ఇవ్వాలని డిమాండ్‌ చేస్తూ సినీ నటుడు శివాజీ ఆదివారం గుంటూరు కలెక్టరేట్ కార్యాలయం ఎదుట అమరణ దీక్ష చేపట్టారు. చిత్ర పరిశ్రమ పెద్దలు, పవన్‌ కల్యాణ్‌ లాంటి నాయకులు పెద్ద మనసుతో తన ఉద్యమానికి మద్దతు ఇవ్వాలని కోరారు. తన దీక్ష స్వార్థం కోసం చేస్తున్నది కాదని, తన ప్రాంతం, తన రాష్ట్రం, తన తెలుగు ప్రజలు, తనను ఇంతవాణ్ణి చేసిన ఈ రాష్ర్టానికి అన్యాయం జరుగుతుంటే చూడలేక ఒక సామాన్య మానవుడిగా ఏపీకి ప్రత్యేక హోదా ఇవ్వాలని డిమాండ్‌ చేస్తూ దీక్ష ప్రారంభించినట్లు చెప్పారు. తన దీక్ష పార్టీలకు సంబంధం లేదని, వ్యక్తిగతంగా చేస్తున్నటువంటి ఉద్యమం అని శివాజీ తెలిపారు.

జనసేన పార్టీ అధ్యక్షులు, పవర్ స్టార్ పవన్ కళ్యాణ్ తల్చుకుంటే ఆంధ్రప్రదేశ్ రాష్ట్రానికి ప్రత్యేక హోదా వస్తుందన్నారు. ప్రత్యేక హోదాపై ఎందుకు ముందడుగు పడటం లేదో పవన్ కళ్యాణ్ కేంద్రాన్ని అడగాలని కోరారు. పవన్ కల్పించుకుంటే బీజేపీ దిగొస్తుందన్నారు. తనకు ఎవరు మద్దతు పలకకపోయినప్పటికీ, ఎవరంతట వారు హోదా కోసం పోరాడాలన్నారు. తన దీక్ష శాంతిమార్గంలో సాగుతుందని చెప్పారు.

కాగా, ప్రత్యేక హోదా కోసం దీక్ష చేస్తున్న నటుడు శివాజీకీ మాజీ కేంద్రమంత్రి, బీజేపీ నాయకురాలు పురంధేశ్వరి షాకిచ్చారు. శివాజీ బీజేపీ సభ్యుడు కాదని తెలిపారు. నటుడు శివాజీకి బీజేపీలో సభ్యత్వం లేదని చెప్పారు. బీజేపీ ఆంధ్రప్రదేశ్ రాష్ట్ర కార్యదర్శి ఈ విషయాన్ని ఇదివరకే ప్రకటించారని పురందేశ్వరి పేర్కొన్నారు. రాష్ట్ర అభివృద్ధికి కేంద్రం కట్టుబడి ఉందని, పోలవరం నిర్మాణానికి కేంద్రం 90 శాతం నిధులు ఇస్తోందని చెప్పారు.

జి. మనోహర్