మళ్లీ భూకంపం అంటూ మెసేజ్ లు..

Posted: 04/29/2015 10:43 AM IST

Rjd mla sent messeges on whatsapp that earth quake soon

ఓ వైపు భూకంపానికి జనాలు భయపడుతూ ఉంటే కొందరు మాత్రం భూకంపాన్ని తమాషా కింద వాడుకుంటున్నారు. అయితే తాజాగా మళ్లీ పెను భూకంపం రాబోతోంది అంటూ వాట్సాప్ లో మెసేజ్ లు వచ్చాయి. అయితే నిజానికి మళ్లీ భూకంపం వస్తున్నట్లు ఎలాంటి సమాచారం లేదు కానీ ఆటపట్టించడానికి ఏకంగా ఓ ఎమ్మెల్యేనే అలా మెసేజ్ లు పెట్టడం వార్తల్లో నిలిచింది.‘‘మళ్లీ పెను భూకంపం రాబోతోంది’’ అంటూ వాట్సప్‌ ద్వారా మెసేజ్‌లు పంపించడంతో బీహార్‌లోని నర్పత్‌గంజ్‌కు చెందిన ఓ మాజీ ఎమ్మెల్యేపై కేసు నమోదుచేసినట్లు పోలీసులు చెప్పారు. ఆర్జేడీ నేత దయానంద్‌ రాయ్‌ రెండు సార్లు ఎమ్మెల్యేగా పనిచేశారు. శనివారం రాత్రి మళ్లీ పెను భూకంపం రాబోతోందని ఆయన మెసేజ్‌లు పంపడంతో ప్రజలు తీవ్రంగా భయాందోళనకు గురయ్యారని పోలీసులు చెప్పారు. దీంతో ఆయనపై సెక్షన్‌ 505 కింద కేసు నమోదు చేశామని చెప్పారు. కాగా, ఆ మెసేజ్‌లకు తన తండ్రికి సంబంధం లేదని.. వాటిని పంపింది తానేనని దయానంద్‌ కుమారుడు రాజేశ్‌ కుమార్‌ వెల్లడించారు. తనకు వచ్చిన ఓ మెసేజ్‌ను పూర్తిగా చదవకుండానే ఇతరులకు పంపానని.. అయితే.. వెంటనే పొరపాటును గ్రహించి క్షమాపణ కూడా చెప్పానని వివరించారు అయినా ఎమ్మెల్యేగా ఉంటున్న ప్రజాప్రతినిధి ఇలా వ్యవహరించడం ఏంటని అందరు అనుకుంటున్నారట.

పాట్నాలో భూకంపం వచ్చిందని అందరూ ఆరుబయటకు వస్తే.. కొందరు దొంగులు మాత్రం అదే అదునుగా తమ చేతివాటం చూపించారు. ఖరీదైన ఇళ్లల్లోని విలువైన సామాగ్రిని భూకంపం పుణ్యమా అని గుట్టుచప్పుడు కాకుండా తరలించేశారు. తీరా భూకంపం లేదు అని తెలుసుకొని ఇంట్లోకి వచ్చిన వారికి అక్కడి సీన్ అర్థమయ్యింది. అప్పటికే అక్కడి నుండి దొంగలు పారిపోయారు. ఇలా భూకంపాన్ని అడ్డంపెట్టుకొని కొంత మంది దొంగతనాలు చేస్తుంటే మరి కొందరు ఆటవిడుపుగా తీసుకుంటున్నారు. ఇళ్లకు కాలి ఒకడు ఏడుస్తుంటే చుట్ట కాల్చుకోవడానికి నిప్పు కావాలని అడిగినట్లు ఉందీ కొంతమంది వ్యవహారం.

*అభినవచారి*