కేసీఆర్ పొమ్మనడానికి నువ్వెవరు..? చంద్రబాబు ప్రశ్న

Posted: 04/29/2015 09:55 AM IST

తెలంగాణ ముఖ్యమంత్రి కేసిఆర్ వైఖరిపై టిడిపి అధ్యక్షుడు నారా చంద్రబాబు నాయుడు మండిపడ్డారు. రాష్ట్రం విడిపోయిన తర్వాత టీడీపీ అధ్యక్షుడు చంద్రబాబుకు ఇక్కడేం పని అని టీఆర్‌ఎస్‌ బహిరంగ సభలో తెలంగాణ ముఖ్యమంత్రి కేసీఆర్‌ చేసిన వ్యాఖ్యకు చంద్రబాబు స్పందించారు. ఆ మాట అనడానికి కేసీఆర్‌ ఎవరు అని చంద్రబాబు ప్రశ్నించారు తెలంగాణతో తనది ముప్ఫై ఏళ్ల అనుబంధం అని,  తెలంగాణలో అభివృద్ధికి పునాదులు వేసింది తానేనని వెల్లడించారు. తాను అధికారం నుండి దిగిపోయే సమయానికి రాష్ట్రంలో మిగులు విద్యుత్‌ ఉందని తెలిపారు తాను ఎన్నో కంపెనీలను తేవడం వల్ల హైదరాబాద్‌కు ఆదాయం పెరిగిందని, దేశంలో తెలంగాణ మిగులు రాష్ట్రంగా ఉందంటే  అదితన శ్రమ అని టిడిపి అధినేత స్పష్టం చేశారు.

అంతేకాపీ కేవలం ఆరు నెలల్లో కేసీఆర్‌ పాలన వల్ల తెలంగాణ మిగులు రాష్ట్రం కాలేదని చంద్రబాబు నాయుడు మండిపడ్డారు.  చేతనైతే తన కంటే బాగా చేసి చూపించాలని చంద్రబాబు సవాల్ విసిరాడు. తనపై  ఏడిస్తే ఉపయోగం లేదని హితవు పలికారు. భౌతికంగా విడిపోయింది నిజం. కానీ మానసికంగా తెలుగువారంతా ఒక్కటే. తెలుగు వారి కోసం తెలుగుదేశం పార్టీ అక్కడా ఉంటుంది...ఇక్కడా ఉంటుందని అన్నారు. గిల్లి కజ్జాలు పెట్టుకొంటూ రెండు రాష్ట్రాల మధ్య తగాదాలు రగిలించేలాటీఆర్‌ఎస్‌ ప్రభుత్వం వైఖరి ఉన్నదని, తాను మాత్రం వీలైనంతవరకూ తెలంగాణకు కూడా సహకరిస్తూ తన పని తాను చేసుకొంటూ పోతున్నానని ఏపి ముఖ్యమంత్రి నారా చంద్రబాబు నాయుడు స్పష్టం చేశారు.

*అభినవచారి*