కమల్ హాసన్ ‘ఉత్తమ విలన్’ చిత్రంపై నిషేధం..

Posted: 04/07/2015 01:18 PM IST

Vishva hindu parishad tamil nadu wing ban on kamal haasan uthama villain

లోకనాయకుడు కమల్ హాసన్ తాజాగా నటించిన ‘ఉత్తమ విలన్’ చిత్రంవిడుదలకు ముందే అనేక అవాంతరాలను ఎదుర్కొంటుంది. నిజానికి ఈ చిత్రం ముందుగా అనుకున్నట్లుగా ఏప్రిల్ 10వ తేదీన రిలీజ్ కావల్సి వుండేది. అయితే.. సెన్సార్ కార్యక్రమాలు పూర్తి కాకపోవడంతో వాయిదా పడింది. ఇక ఎటువంటి సమస్య లేదని యూనిట్ సభ్యులు భావిస్తుండగా.. ఇంతలోనే ఈ చిత్రంపై నిషేధం విధించాలంటూ విశ్వహిందూ పరిషత్(వీహెచ్ పీ) పిలుపునిచ్చింది. లేకపోతే తీవ్ర పరిణామాలు ఎదుర్కోవలసి వస్తుందని ఆ పరిషత్ హెచ్చరిస్తోంది.

త్వరలోనే ప్రేక్షకుల ముందుకు వచ్చేందుకు సిద్ధంగా వున్న ‘ఉత్తమ విలన్’ చిత్రంలో కొన్ని సన్నివేశాలు హిందూవుల మనోభావాలను కించేపరిచే అవకాశం ఉన్న కారణంగా నిలుపుదల చేయాలంటూ పోలీస్ కమిషనర్ కు వీ.హెచ్.పీ ఓ నివేదికను సమర్పించింది. ముఖ్యంగా.. విష్ణుమూర్తి భక్తుడు ప్రహ్లాదకు, హిరణ్యకశపుడు అనే రాక్షసుడికి జరిగే సంభాషణ ఆధారంగా ఈ మూవీలో తెరకెక్కిన ఓ పాటలో ఒక పాట విష్ణుమూర్తి భక్తులను నిరాశకు గురి చేస్తుందని వివరించింది. దీంతో ఆ సినిమా బ్యాన్ చేయాల్సిన అవసరం ఉందని పేర్కొంది. అంతేకాదు.. ఈ మూవీకి వ్యతిరేకంగా నిరసనలు చేపట్టేందుకు వారు ప్రణాళికలు చేస్తున్నట్లు కమీషనర్ కు చెప్పినట్లు తెలుస్తోంది.

మరి.. ఈ విషయంపై ‘ఉత్తమ విలన్’ యూనిట్ సభ్యులు, కమల్ హాసన్ ఏ విధంగా స్పందిస్తారో వేచి చూడాలి. ఇదిలావుండగా.. ఈ చిత్రంలో ప్రముఖ దర్శకుడు బాలచందర్ ఓ ప్రత్యేక పాత్రలో నటించారు. ప్రసిద్ధ నటుడు రమేష్ అరవింద్ దర్శకత్వంలో తెరకెక్కిన ఈ చిత్రాన్ని కమల్, ఎన్.లింగుస్వామి సంయుక్తంగా నిర్మించారు.