వామ్మో.. ‘అంకుల్’ అని పిలిచినందుకే దాడి?

Posted: 04/07/2015 01:43 PM IST

ఇటీవలే ఎయిరిండియా విమానంలోని కాక్ పిట్ లో ఇద్దరూ పైలట్లు కొట్టేసుకున్న విషయం తెలిసిందే! జైపూర్ నుంచి ఢిల్లీకి విమానం బయలుదేరడానికి ముందు కాక్ పిట్ లో కెప్టెన్, కో- పైలట్ ఘర్షణ పడిన ఘటన తారా స్థాయికి చేరింది. వారిద్దరూ కాక్ పిట్ ను రణరంగ క్షేత్రంగా మార్చేశారు. జైపూర్ లో ఆదివారం చోటు చేసుకున్న ఈ ఘర్షణ వెనుక కెప్టెన్ ను కో-పైలట్ అసభ్య పదజాలంతో దూషించడంతో పాటు దాడికి కూడా తెగబడ్డాడని ఎయిర్ లైన్స్ వర్గాలు ఇదివరకే వెల్లడించాయి. కానీ.. ఈ గొడవ జరగడానికి కారణమేంటో ఇప్పుడు వెలుగులోకి వచ్చింది. కెప్టెన్ తన కో పైలట్ ను అంకుల్ అని పిలవడం వల్ల అతను కోపాద్రిక్తుడై కెప్టెన్ పై దాడికి దిగాడని తెలిసింది.

విమానం టేక్ ఆఫ్ కు ముందు కెప్టెన్ తన కో-పైలట్ ని అంకుల్ అని పిలిచాడు. సీనియర్ పైలట్ అయిన కెప్టెన్ వయస్సులో తన కో-పైలట్ కంటే యువకుడు కావడంతో  అతడిని అంకుల్ అని ఉచ్చరించాడు. దీంతో కో పైలట్ విభేదించి కెప్టెన్ తో ఘర్షణకు దిగాడు. ‘తనను అంకుల్ అనడానికి నువ్వు ఎవరు?’ అని కో-పైలట్ ప్రశ్నించాడు. అంతటితో ఆగకుండా కెప్టెన్ ను అసభ్య పదజాలంతో దూషించి అతడిపై దాడి చేశాడు. ఈ విషయాన్ని ఎయిర్ లైన్స్ వర్గాలు స్పష్టం చేశాయి. దీనిపై తమకు ఫిర్యాదు అందిందని త్వరలోనే ఈ ఘటనపై విచారణ జరిపిన అనంతరం తగిన చర్యలు తీసుకుంటామని అధికారి ప్రతినిధి ఒకరు స్పష్టం చేశారు.