రాజధాని రచ్చ.. రాజేసినా రాజుకోలేదు..

Posted: 03/25/2015 12:38 PM IST

రాజధాని ప్రాంత రైతులు, రైతు కూలీలు, కౌలు రైతుల పరిస్థితులు, వారి వేదనలపై రాష్ట్ర అసెంబ్లీలో చర్చించేందుకు వైసీసీ చేసిన యత్నాలు అనుకూలించలేదు. రాజధాని రచ్చ రాజుకుందని అనుకునే లోపు అరిపోయింది. ఈ ప్రాంత ప్రజల బాధలపై శాసనసభలో చర్చ జరగాలని డిమాండ్ చేసిన ప్రతిపక్షం సభ వాయిదా వేయించడంలో సక్సెస్ అయ్యిందే కాని.. అంశాన్ని చర్చించడం ప్రస్తుతానికి అవసరం లేదన్న అధికార పక్షానిదే పైచేయిగా నిలిచింది. మార్చి 16న సెక్షన్ 344 కింద వాయిదా తీర్మాణం మేరకు రాజధాని అంశాన్ని చేపట్టాలని ప్రతిపక్ష నేత జగన్ కోరారు. వాయిదా అనంతరం తిరిగి ప్రారంభమైన సభలో ఆయన మాట్లాడుతూ సీఆర్డీఏ బిల్లుపై మాత్రమే గత అసెంబ్లీలో చర్చ జరిగిందన్నారు.

గత సమావేశాల్లో రైతులు, రైతుకూలీలు, కౌలు రైతుల గురించి చర్చ జరగలేదన్నారు. ప్రతిపక్షం లేవెనెత్తిన అంశం ఇదివరకే అసెంబ్లీలో చర్చకు వచ్చిందని, మరో సారి అదే అంశంపై చర్చ జరపడం మంచిది కాదని స్పీకర్ కోడెల సూచించారు. దీంతో ఆంధ్రప్రదేశ్ రాజధానిపై చర్చను స్పీకర్ విజ్ఞతకే వదిలేస్తున్నట్లు జగన్ అన్నారు. రాజధాని ప్రాంతంలో రైతులను భయభ్రాంతులకు గురిచేశారని, వారిపై విపరీతమైన ఒత్తిళ్లు తీసుకొచ్చి బలవంతంగా భూసమీకరణ చేశారని ప్రతిపక్ష సభ్యులు ఆరోపించారు. రాజధాని ప్రాంతంపై ప్రభుత్వం చెప్పేదానికీ, వాస్తవ పరిస్థితులకు మధ్య చాలా వ్యత్యాసం ఉందని, వీటిని సభ దృష్టికి తీసుకురావాల్సిందేనని స్పష్టం చేసింది. అత్యంత కీలక అంశం అయినందున దీనిపై చర్చించాలని గట్టిగా పట్టుబడుతూ మరోసారి సభను అడ్డుకుంది. దీంతో సభ రెండోసారి వాయిదా పడింది.  

జి. మనోహర్