స్వర్గం.. నరకం గేట్ వరకు వెళ్లి వచ్చిన రైలు

Posted: 11/12/2014 10:22 AM IST

భారతీయ రైల్వే చరిత్రలో పెను ప్రమాదం తృటిలో తప్పింది. ప్రమాదం అంచుల వరకు వెళ్ళిన రైలు గేట్ మెన్ అప్రమత్తత వల్ల వెనక్కి వచ్చింది. దేశంలోనే అత్యంత వేగంగా వెళ్ళే రైలుగా పేరున్న ప్రతిష్టాత్మక శతాబ్ది ఎక్స్ ప్రెస్ రైలు సోమవారం భారీ ప్రమాదం నుంచి తప్పించుకుంది. ఎప్పట్లాగే సోమవారం ఉదయం న్యూ ఢిల్లీ నుంచి అజ్మీర్ కు శతాబ్ది ఎక్స్ ప్రెస్ బయల్దేరింది. ప్రయాణ సమయంలో రైలులో 300మంది వరకు ప్రయాణికులు ఉంటారని అంచనా. జైపూర్ కు 40 కిలోమీటర్ల దూరంలో బోబాస్ అనే స్టేషన్ కు చేరుకునే ముందు రైలులో ఏదో లోపం ఉన్నట్లు గేట్ మెన్ కలురాం గుర్తించాడు.

వెంటనే స్టేషన్ మాస్టర్ రామావతార్ కు సమాచారం ఇచ్చాడు. అయితే మెరుపువేగంతో ప్రయాణిస్తున్న రైలు రామావతార్ స్పందించేలోపు బోబాస్ దాటేసింది. గేట్ మెన్, స్టేషన్ మాస్టర్ లో భయాందోళనలు పెరిగాయి. విషయాన్ని రైల్వే సూపరిండెంట్ కు చెప్పారు. దీంతో ఆయన రైలు మార్గంలోని తర్వాతి స్టేషన్ అస్సాలర్పూర్ సమీపంలో రైలును ఆపివేయించారు. తనిఖీ చేస్తే.., రైలులో ఒక చక్రం సగంమేర విరిగిపోయి ఉంది. ఇది చూసి అధికారులు షాక్ అయ్యారు. ఇంకొద్ది దూరం ఇదే స్పీడుతో ప్రయాణించి ఉంటే పెను ప్రమాదం జరిగేది. ఈ నష్టాన్ని ఊహిస్తేనే వణుకు పుడుతుంది అని అధికారులు తెలిపారు.

ఇక రైలుకు కొత్త చక్రం అమర్చి తిరిగి ప్రయాణం ప్రారంభించారు. రైల్వే శాఖలో అత్యంత ప్రతిష్టాత్మకమైన ఈ రైలుకు న్యూఢిల్లీలో బయల్దేరేముందు సిబ్బంది పూర్తిగా తనిఖీలు చేస్తారు. బోగీల అనుసంధానం, ఇంజన్ లో లోపాలు తదితర అంశాలను పరిశీలించి అన్ని ఓకే అనుకుంటే జర్నీ మొదలు పెట్టమని సూచనలు ఇస్తారు. కాని ఒక చక్రం సగం మేర విరిగిపోయిందంటే సిబ్బంది సరిగా తనిఖీ చేయలేదని అధికారులు భావించారు. ఈ ఘటనపై ధర్యాప్తుకు ఆదేశించిన నార్త్ వెస్ట్ రైల్వే బాధ్యులపై కఠిన చర్యలు తీసుకుంటామని హెచ్చరించింది.