నిన్న నచ్చింది.. ఈరోజు నచ్చలేదు! జగన్

Posted: 07/04/2014 02:30 PM IST

(Image source from: ysr congress party double games on zptc elections)

తాము చేసే పనులు మంచివి... ఇతరులు చేసేవి అపచారమన్నట్లుగా వైఎస్ఆర్ కాంగ్రెస్ పార్టీ వ్యవహారం కనిపిస్తోంది. సాధారణంగా రాజకీయపార్టీల్లో సందర్భాలను బట్టి శత్రువులు, స్నేహితులుగా.. స్నేహితులు శత్రవులుగా మారిపోతారు. మొన్నటివరకు మానుంచి అన్నీ సహాయసహకారాలు అందిస్తామని చెప్పుకున్న వైఎస్ఆర్ కాంగ్రెస్ పార్టీ.. ఇప్పుడు దానికి విరుద్ధంగా వ్యవహరిస్తున్నట్లు కనిపిస్తోంది.

ప్రస్తుతం స్థానిక సంస్థలకు, పురపాలకులకు పరోక్ష ఎన్నికలు జరుగుతున్న విషయం తెలిసిందే. అందులో పురపాలక ఎన్నికలు గురువారంతో పూర్తికాగా... మండల, జడ్పీలకు ఇంకా జరగాల్ని వుంది. అయితే ఈ ఎన్నికల్లో పాల్గొనే ప్రతినిధులను తమకు అనుకూలంగా మార్చుకునేందుకు పార్టీలు బేరసారాలు ఆడుతున్నట్టు స్పష్టంగా కనిపిస్తోంది. పాలక ప్రతిపక్షాలు అనే తేడా ఏమీ లేకుండా అవకాశం వున్న ప్రతిఒక్కచోట పార్టీలు బేరసారాలకు పాల్పడుతున్నాయి. సహజంగా అధికారం వున్న పార్టీకే ఎక్కువ అడ్వాంటేజీ వుంటుంది గనుక... టీడీపీ అభ్యర్థులు ఎక్కువ చోట్ల వైఎస్ఆర్ పార్టీ వాళ్లను ఆకట్టుకుంటే... మరికొన్నిచోట్ల వైకాపా, తెదేపా వారిని ఆకట్టుకోవడంలో ప్రయత్నాలు ముమ్మరం చేస్తున్నారు.

ఈ వ్యవహారం అంతా పక్కన పెడితే... మునిసిపల్ ఎన్నికల్లో ఎక్స్అఫీషియా సభ్యులుగా ఎమ్మెల్యే, ఎంపీలు ఓట్లు వేయడాన్ని వైకాపా మాత్రం బాగా వాడేసుకుంది. వారి ఓట్లవల్ల వైకాపాకు కొన్నిచోట్ల అడ్వాంటేజ్ వుండటం వల్ల వారు అలా చేశారు. అయితే మండల జడ్పీ ఎన్నికలకు మాత్రం.. ఎమ్మెల్యే, ఎంపీలకు ఎక్స్అఫీషియా సభ్యులుగా ఓటింగ్ అవకాశం ఇవ్వొద్దంటూ ఎన్నికల సంఘానికి వైకాపా ఫిర్యాదు చేస్తోంది. వీరు ఎన్నికలను ప్రభావితం చేస్తారంటూ వైకాపా ఆరోపణలు చేస్తోంది. తాము గెలిచే అవకాశం వున్నప్పటికీ.. ఈ విధంగా కుంటిసాకులు వేయడానికి గల కారణాలు మాత్రం అర్థం కావడం లేదు. దీనిపై కొందరు నేతలు.. వైకాపాకు గెలిచే అవకాశం వున్నా మునిసిపల్ ఎన్నికల్లో ఒక నీతి, ఓడే చాన్సున్న జడ్పీ ఎన్నికల్లో ఇంకో నీతి పాటించే వక్రబుద్ధులు వైకాపా సాధ్యమవుతుందని ఎద్దేవా చేస్తున్నారు.