ఈరోజు ప్రధాని నియమితులు మోదీ కార్యక్రమాలు

Posted: 05/21/2014 08:55 AM IST

ఒకపక్క అభినందనలు అందుకుంటూనే ప్రధానమంత్రిగా నియమితులైన నరేంద్ర మోదీ ఒక్కో పనిని పూర్తి చేసకుంటున్నారు.  

అక్టోబర్ 7, 2001 నుంచి గుజరాత్ ముఖ్యమంత్రిగా పనిచేసిన నరేంద్ర మోదీ ఈ రోజు గుజరాత్ గవర్నర్ కమ్లా బేణీవాల్ కి రాజీనామా సమర్పించనున్నారు.  మంగళవారం రాష్ట్రపతి చేత ప్రధానమంత్రిగా నియమించబడ్డ మోదీ 26న ప్రమాణం స్వీకారం చెయ్యటానికి ఆయన అంగీకారాన్ని తీసుకున్నారు.  ఈ లోపులో మోదీ చెయ్యవలసిన పనులు కొన్ని ఉన్నాయి.  అందులో మొదటిది ఈ రోజు ముఖ్యమంత్రి పదవికి చెయ్యనున్న రాజీనామా.  రెండవది గుజరాత్ లో మరో ముఖ్యమంత్రిని నియమించటం.  మూడవది లోక్ సభకు వడోదర, వారణాసిలలో గెలుపొందిన మోదీ వాటిలో ఒక స్థానాన్ని వదులుకోవటం.  

ఈ రోజు మధ్యాహ్నం 3.30 గంటలకు మోదీ ముఖ్యమంత్రి పదవికి రాజీనామా సమర్పించనున్నారు.  ఈ విషయాన్ని భారతీయ జనతా పార్టీ అధికార ప్రతినిధి హర్షద్ పటేలే వెల్లడించారు.  శాసన సభాపక్ష సమావేశంలో మోదీ స్థానంలో ఎవరిని ఎంపిక చెయ్యాలన్నది నిర్ణయించబడుతుంది.  ఈ ప్రక్రియంతా సజావుగా సాగటం కోసం భాజపా సీనియర్ నేత తవర్ చంద్ గెహ్లాట్ ని పరిశీలకునిగా పంపించటం జరుగుతోంది.  ఆ తర్వాత స్పీకర్ వాజూభాయ్ వాలాతో సమావేశమైన తర్వాత మోదీ తన రాజీనామా పత్రాన్ని గవర్నర్ కి సమర్పిస్తారు.  

రేపు గుజరాత్ కొత్త ముఖ్యమంత్రి ప్రమాణ స్వీకారానికి కూడా మోదీ హాజరయ్యే అవకాశం ఉంది.

-శ్రీజ