కొత్త రాష్ట్రంలో తొలి ప్రభుత్వం మాదే- తెరాస ధీమా!

Posted: 05/02/2014 10:50 AM IST

29 వ రాష్ట్రంగా కొత్తగా ఏర్పడుతున్న తెలంగాణాలో తొలి ప్రభుత్వం మాదేనంటూ తెలంగాణా రాష్ట్ర సమితి అధ్యక్షుడు కె చంద్రశేఖరరావు ధీమా వ్యక్తంచేసారు.  

బుధవారం జరిగిన పోలింగ్ తర్వాత సర్వే నిర్వహించిన తెరాస తమ పార్టీకి 58 నుంచి 75 అసెంబ్లీ స్థానాలు, 12 నుంచి 14 లోక్ సభ స్థానాలు లభించటం ఖాయమంటున్నారు.  60 అసెంబ్లీ స్థానాలైతే ఎటూ పోవని, స్వతంత్ర అభ్యర్థులలో కొందరు తెరాసలో చేరిపోతారని కెసిఆర్ భావిస్తున్నారు.  దానితో ప్రభుత్వాన్ని ఏర్పాటు చెయ్యటానికి ఎటువంటి అడ్డంకీ ఉండదని తెరాస భావిస్తోంది.

దీనికి ప్రతిగా కాంగ్రెస్ పార్టీ కూడా ప్రభుత్వాన్ని ఏర్పాటు చేస్తామని చెప్తోంది.  తెలంగాణా పిసిసి అధ్యక్షుడు పొన్నాల లక్ష్మయ్య గెలిచే సీట్ల సంఖ్యను వెల్లడి చెయ్యటానికి ఇష్టపడలేదు.  కానీ కాంగ్రెస్ నేతలు గెలుస్తున్నట్లుగా తెలుసుకుని ఆ సంతోషంలో ఉన్నారని, తెరాస నేతలు మాత్రం గెలుపొందే ఆనందాన్ని నటిస్తున్నారని అన్నారు.  

తమపై కెసిఆర్ చేసిన ఆరోపణలను మీడియా ప్రస్ఫుటంగా ప్రసారం చేసిందని, కానీ తాము సమాధానంగా ఇచ్చిన విషయాలను మాత్రం కవర్ చెయ్యలేదని పొన్నాల వాపోయారు.  కెసిఆర్ వ్యాఖ్యలకు కాంగ్రెస్ నేతలంతా దీటైన సమాధానం చెప్పినా అది మీడియాలోకి రానందుకు పొన్నాల విచారాన్ని వ్యక్తంచేసారు.  

మే 16 కల్లా ఏ విషయం తేలిపోతుందని అందరికీ తెలిసిన విషయాన్నే పొన్నాల తెలియజేసారు.  తెరాస నాయకులు మాత్రం గెలుస్తామన్న ధీమాలో ఢిల్లీ ప్రయాణానికి కూడా ఏర్పాట్లు చేసుకుంటున్నారు.

-శ్రీజ