తెరాస పాత్ర ఏమీలేదు, భాజపా అడ్డుపడింది- సోనియా

Posted: 04/17/2014 01:34 PM IST

తెలంగాణా రాష్ట్రం ఏర్పడటంలో తెలంగాణా రాష్ట్ర సమితి పాత్ర ఏమీ లేదని, రాష్ట్ర విభజన కాంగ్రెస్ పార్టీ పట్టుదల వలనే జరిగిందని, మరో పక్క భారతీయ జనతా పార్టీ చివరి క్షణం వరకు విభజనకు వ్యతిరేకంగానే పాటుపడిందని సోనియా గాంధీ కరీంనగర్ సభలో అన్నారు. 

మేం తప్ప మరో పార్టీ చేత ఈ పని అయ్యేది కాదని, తెలుగు దేశం పార్టీ, వైయస్ ఆర్ కాంగ్రెస్ పార్టీలు తెలంగాణాను అడ్డుకోవటానికి శాయశక్తులా పనిచేసారని అన్నారు సోనియా గాంధీ.   తెరాస 2001 లో ఉద్యామాన్ని లేవనెత్తితే, అంతకు ముందు నుంచే కాంగ్రెస్ పార్టీ తెలంగాణా కోసం గళమెత్తిందని ఆమె అన్నారు. 

ఇప్పుడు రాష్ట్ర విభజన జరిగిపోయింది కనుక తెలంగాణా రాష్ట్రంలో ఆర్థిక, సామాజిక అభివృద్ధికోసం, సామాజిక న్యాయం చెయ్యటం కోసం పాటుపడటం కాంగ్రెస్ పార్టీ ధ్యేయమని, తెలంగాణాను 29 వ రాష్ట్రంగా తీర్చిదిద్దుతామని సోనియా గాంధీ అన్నారు.

2004 లో ఇదే కరీం నగర్ వేదికగా ఇచ్చిన వాగ్దానాన్ని కాంగ్రెస్ నెరవేర్చిందని, తెరాస మాత్రం దాడులు, హెచ్చరికలు చేసే పనిలో ఉంటూ వచ్చిందని, తెలంగాణా రాష్ట్ర ఆవిర్భావంలో తెరాస కృషి ఎంతమాత్రం లేదని, కాంగ్రెస్ పార్టీ సమాజంలోని అన్ని వర్గాలనూ కలుపుకు పోతుందని సోనియా గాంధీ అన్నారు.  ఆమె తన 14 నిమిషాల ప్రసంగంలో తెలంగాణా తెచ్చిన ఖ్యాతంతా కాంగ్రెస్ దే నని నొక్కి వక్కాణించారు. 

తెలంగాణా ఏర్పాటు చెయ్యటంలో జాప్యం జరిగిన మాట నిజమే కానీ అది ఏకాభిప్రాయం కుదరకపోవటం వలనే జరిగిందని, 60 సంవత్సరాల తెలంగాణా ప్రజల కల సాకారమైన మధురానుభూతిని వారితో పంచుకోవటానికే తాను వచ్చానని సోనియా గాంధీ అన్నారు.  అయితే రెండు ప్రాంతాలు తనకి సమానమేనని, ఇరు ప్రాంత ప్రజలు అన్యోన్యంగా మెలుగుతూ ఇరు ప్రాంతాలలోను అభివృద్ధిని సాధించాలని సోనియా పిలుపునిచ్చారు. 

-శ్రీజ