టిఆర్ఎస్ ను ఎండగట్టిన టి జెఏసి

Posted: 03/29/2014 09:09 AM IST

టిజెఎసి ఛైర్మన్ కోదండరామ్ అధ్యక్షతన శుక్రవారం జరిగిన టిజెఎసి విస్తృతస్థాయి సమావేశంలో టిజెఎసిని నిర్వీర్యం చెయ్యాలని టిఆర్ఎస్ చూస్తోందన్న వాదన చర్చలోకి వచ్చింది. 

తెలంగాణాలో చేపట్టిన నిరసన కార్యక్రమంలో పలుమార్లు కాంగ్రెస్ నాయకుల దిష్టిబొమ్మలను తగలబెట్టటం, వాళ్ళని తెలంగాణా ద్రోహులుగా ప్రకటించటం జరిగిందని, వాళ్ళకి తెలంగాణాలో స్థానం లేకుండా చెయ్యాలనే పిలుపును పలుమార్లు జనంలోకి తీసుకెళ్ళటం కూడా జరిగిందని, అదే విధానంలో కాంగ్రెస్ టిడిపి నాయకులతో జెఏసి కార్యకర్తలు పోరడారని, ఇప్పుడు అదే నాయకులను తెరాస తన పార్టీలో చేర్చుకోవటం జరుగుతోందని అన్న జెఏసి నాయకులు, నిన్నటి దాకా తెలంగాణా ద్రోహులైనవారు తెరాసా లో చేరగానే పునీతులౌతారా అంటూ ప్రశ్నించారు. 

భాజపాను వాడుకున్నంత కాలం వాడుకున్న తెరాస ఇప్పుడు ఆ పార్టీని పక్కకు పెట్టేసిందని కూడా వ్యాఖ్యానించటం జరిగింది. 

టి జెఏసి తరఫున తెలంగాణాలో రాజకీయ ఎజెండాను తయారు చేసి దాన్ని అన్ని రాజకీయ పార్టీలు అనుసరించే విధంగా తీర్మానం చెయ్యటం కోసం జరిగిన ఈ విస్తృతస్థాయి స్టీరింగ్ కమిటీ సమావేశంలో చర్చంతా తెరాస మీదకు పోవటంతో ఆ సమావేశంలో ఉన్న తెరాస నాయకుడు శ్రవణ్ మధ్యలోనే సమావేశం లోంచి లేచి వెళ్ళిపోయారు. 

టిఆర్ఎస్ లో చేరగానే వాళ్ళంతా తెలంగాణా వాదులైపోయినట్లైతే ఇంతకాలం ఉద్యమం చేసిన వాళ్ళ సంగతేమిటని అనేక మంది ప్రశ్నించారు.

టిజెఏసి పునర్నిర్మాణం అవసరమని, రాజకీయ పార్టీలలోకి వెళ్ళదలచుకున్న జెఏసి నాయకులు వెళ్ళవచ్చని, అయితే కొందరు జెఏసి నాయకులకు కొన్ని పార్టీలలో చేరటానికి అవకాశం దొరికినా క్రింది స్థాయి జెఏసి కార్యకర్తలకు జెడ్పిటిసి ఎంపీటీసీ బి ఫారాలను కూడా సంపాదించలేకపోయామని, 2009 లో ఎన్నికై ఎమ్మెల్యేలుగా పనిచేసిన వారు పార్టీ మారి 2014 లో మరోసారి ఎమ్మెల్యేలు అవటమే తెలంగాణా పునర్నిర్మాణమవుతుందా అని జెఎసి నాయకులు ఆవేదన వ్యక్తం చేసారు. 

టిజెఏసి నుంచి రాజకీయాల్లోకి వెళ్ళినవారిని ఎన్నికలలో వారి గెలుపు ఓటమిలతో సంబంధం లేకుండా, తిరిగి జెఏసి లోకి రానివ్వద్దనే ప్రతిపాదనకు కోదండరామ్ సుముఖత చూపించారు.

-శ్రీజ