నమోతో భేటీకి నాన్సీ పౌవెల్ ఉత్సుకత!

Posted: 02/11/2014 02:20 PM IST

అమెరికా దౌత్యాధికారి నాన్సీ పౌవెల్ నరేంద్ర మోదీతో భేటీకి తయారవుతున్నారు.  దీనితో అమెరికా ప్రభుత్వానికి మోదీ విషయంలో దిగిరాక తప్పలేదని అర్థమౌతోంది. 

2005లో నరేంద్ర మోదీకి అమెరికన్ వీసాను ఇవ్వటానికి నిరాకరించిన స్టేట్ డిపార్ట్ మెంట్ తీసుకున్న నిర్ణయం విషయంలో మాట్లాడుతూ అప్పటి దౌత్యాధికారి డేవిడ్ మల్ఫోర్డ్, 2002 లో గుజరాత్ లో జరిగిన మారణహోమానికి రాష్ట్ర సర్వాధికారిగా ఉన్న నరేంద్ర మోదీ బాధ్యులని అందువలన ఆయన వీసాను రద్దు చేస్తున్నామని చెప్తూ, ఇది కేవలం నరేంద్ర మోదీ కి మాత్రమే వర్తిస్తుందని, నిజానికి ప్రతినెలా వేలాది మంది గుజరాత్ వాసులకు అమెరికా వీసా జారీ చెయ్యటం జరుగుతోందని అన్నారు. 

ఆ తర్వాత ప్రతి సంవత్సరం యాంత్రికంగా మోదీ వీసాను తిరస్కరిస్తూ వస్తున్నారు.  ఎవరైనా భారతీయుడు అమెరికా పోలేకపోతే అమెరికాయే అతని దగ్గరికి వస్తుందని స్వామి వివేకానంద అన్నట్లుగా నాన్సీ పౌవెల్ భారతదేశంలో జరుగుతున్న పరిణామాలను పురస్కరించుకుని భాజపా ప్రధానమంత్రి అభ్యర్థిగా ఇప్పటికే ఎంతో మద్దతు కూడగట్టుకున్న నరేంద్ర మోదీతో భేటీ కోరుతున్నారు.  కోర్టు కూడా ఆయన మీదున్న గుజరాత్ అల్లర్ల అబియోగాలన్నిటినీ కొట్టివేసింది. 

2005 తర్వత మోదీ అమెరికా వీసా కోసం అప్లై చెయ్యలేదు.  మోదీ వీసాకు అప్లై చేసుకోవచ్చునని, అలా చేసినట్లయితే దాన్ని పరిశీలిస్తామని అమెరికా ప్రభుత్వం చెప్తూ వస్తోంది కానీ భాజపా సీనియర్ నాయకుడు అరుణ్ జైట్లీ కూడా మోదీ వీసా కోసం అప్లై చెయ్యకూడదనే అభిప్రాయాన్ని వెలిబుచ్చారు. 

నరేంద్ర మోదీ వీసాను రద్దు చేసినపుడు అమెరికాకు ఆయన స్థాయి ఏమిటో తెలియదు కానీ ఇప్పుడు ఆయన వచ్చే ఎన్నికలలో ప్రధానమంత్రి కావొచ్చు, సర్వేలు కూడా అందుకు అనుకూలంగానే నివేదికలిస్తున్నాయి.  కాబట్టి ఇప్పుడు పౌవెల్ కలుద్దామనుకుంటున్నది భావి భారత ప్రధాని కాగల మోదీని. 

నరేంద్ర మోదీ ప్రధానమంత్రి అయినట్లయితే ఆ హోదాలో ఆయన అమెరికా పోవటానికి ఆయనకు ఏ బిజినెస్ లేక విజిటర్ వీసా అవసరమూ పడదు.  అందువలన నరేంద్ర మోదీ తన అమెరికన్ వీసా గురించి పెద్దగా పట్టించుకున్నట్లుగా కనపడటం లేదు.

-శ్రీజ