ఎల్లుండే తెలంగాణ బిల్లు అసెంబ్లీకి

Posted: 12/07/2013 02:16 PM IST

కాంగ్రెస్ అధిష్టానం తెలంగాణ విషయంలో ఎవరి మాట వినడం లేదు. రానున్న ఎన్నికల్లో అధికారమే లక్ష్యంగా తెలంగాణ బిల్లు విషయంలో ముందుకు సాగుతుంది. మొన్న రాత్రి కేభినెట్ భేటీలో అచ్చంగా పది జిల్లాల తెలంగాణ బిల్లుకు ఆమోద ముద్ర వేసి, నిన్న రాత్రి రాష్ట్రపతి ఆమోదం కోసం ఆయన కార్యాలయానికి పంపిన విషయం తెలిసిందే.

అక్కడి నుండి నేరుగా రాష్ట్ర అసెంబ్లీకి వస్తుందని తెలిసింది. అయితే ఎప్పుడు వస్తుందనే తేదీని మాత్రం వెల్లడించలేదు. కానీ నేడు కేంద్ర మంత్రి జైరాం రమేష్ తెలంగాణ బిల్లు డిసెంబర్ 9వ తేదీన అనగా సోమవారం రోజున అసెంబ్లీకి వస్తుందని ఢిల్లీలో మీడియాకు తెలిపారు. బహుశా వారం రోజులపాటు చర్చకు గడువు ఇవ్వవచ్చని అంటున్నారు.

ఈ నెల పన్నెండు నుంచి శాసనసభ సమావేశాలు జరుగుతున్నందున మొదటి ఐటమ్ గా దీనినే చేపట్టే అవకాశం కనబడుతోంది. ఇన్ని రోజులు నీటి కేటాయింపుల విషయంలో సమస్యలు వస్తాయని నెత్తి నోరు మొత్తుకున్న కిరణ్ కు ఆ విషయంలో ఇరు రాష్ట్రాలకు ప్రాజెక్టుల వారిగా బ్రిజేష్ కుమార్ కమిటీ సూచించిన దాని ప్రకారం కేటాయింపులు చేస్తారని తెలిపారు.