ఢిల్లీ వాసులకు రాత్రంతా నిద్రలేదు

Posted: 11/12/2013 10:42 AM IST

 

ఓవైపు ఢిల్లీలో కాంగ్రెస్ అధినాయకత్వాన్ని తెలంగాణ విభజన అంశం నిద్ర లేకుండా చేస్తుంటే... దానికి తోడు భూకంపం కూడా తోడై కాంగ్రెస్ పెద్దలకు ఢిల్లీ వాసులకు నిద్ర లేకుండా చేసింది. గత అర్థరాత్రి కొత్తఢిల్లీలో స్వల్ప భూకంపం సంభవించింది. దీని తీవ్రత రిక్టర్ స్కేలు పై 3.1 గా నమోదు అయినట్లు భారత వాతావరణ శాఖ ఈ రోజు ఉదయం వెల్లడించింది.

 

భూకంప తీవ్రత తక్కువగా ఉండటంతో ప్రమాదం ఏం సంభవించలేదని, అర్థరాత్రి 12.30 గంటల సమయంలో రెండు సార్లు, ఆ తరువాత రెండు సార్లు భూమి స్వల్పంగా కంపించడంతో స్థానిక ప్రజలు భయాందోళనకు గురయ్యారు. తక్కువ సమయంలోనే నాలుగు సార్లు భూమి కంపించడంతో నగర ప్రజల్లో  భయాందోళనలు రెట్టింపు అయ్యాయి.

 

భూకంపం సంభవించిన ప్రాంతాల్లోని ప్రజలు గత రాత్రి అంతా నిద్ర లేకుండా బిక్కుబిక్కుమంటు భయంతో గడిపారు. ఆ సమయంలో మెలకువతో ఉన్న ప్రజలు రోడ్ల పైకి పరుగులు తీశారు. ఈ భూకంపం సంభవించడానికి గల కారణాల పై శాస్ర్తవేత్తలు అధ్యనయం చేస్తున్నట్లు తెలిపారు.