మరి కొన్ని గంటల్లో తెలంగాణ

Posted: 07/29/2013 09:30 PM IST

గత కొన్నేళ్ళుగా తెలంగాణ ప్రజలు ఎప్పుడెప్పుడా అని ఎదురుచూస్తోన్న తెలంగాణ ఏర్పాటు విషయం పై స్పష్టమైన ప్రకటన రావడానికి మరి కొన్ని గంటలు మాత్రమే ఉంది. గత కొన్ని రోజుల నుండి కాంగ్రెస్ అధిష్టానం ఈ అంశం పై శరవేగంగా పావులు కదుపుతున్న విషయం తెలిసిందే. రాష్ట్ర నేతలతో కోర్ కమిటీ భేటీ తరువాత నిర్ణయాన్ని సీడబ్ల్యూసీలో తేలుస్తామని అధిష్టానం మాటగా దిగ్విజయ్ సింగ్ చెప్పిన విషయం తెలిసిందే. ఆ సమయం రానే వచ్చింది. రేపు సాయంత్రం కాంగ్రెస్ సమన్వయ కమిటీ సమావేశం నిర్వహించనున్నారు. ఈ సమావేశం తరువాత తెలంగాణ పై కాంగ్రెస్ పార్టీ ఏదో ఒక నిర్ణయం వెలువరిస్తుందని అంటున్నారు. ఇక రాష్ట్రంలో చూస్తున్న తాజా పరిణామాలు కూడా స్పష్టమైన ప్రకటన వెలువడుతుందని చెబుతున్నాయి. రేపు ప్రకటన అనంతరం ఎలాంటి సంఘటనలు చోటు చేసుకోకుండా కేంద్ర బలగాలను రాష్ట్రంలో, ముఖ్యంగా సీమాంధ్ర ప్రాంతంలో భారీగా మోహరిస్తున్నారు. ఇప్పటికే రాష్ట్రంలో పారా మిలటరీ బలగాలను తరలించారు. విజయవాడ, గుంటూరు, విశాఖపట్నం తదితర ప్రాంతాలకు కేంద్ర బలగాలు చేరుకున్నాయి. అలాగే తిరుపతి, కడపలకు కూడా పెద్ద ఎత్తున కేంద్ర బలగాలు తరలివె ళ్తున్నాయి. తెలంగాణ ప్రాంతంలో బలగాలను మోహరించకుండా సీమాంధ్రలో మోహరించడం పై ప్రకటన టి.కి అనుకూలంగా వచ్చే అవకాశం ఉందని అంటున్నారు. కేంద్ర బలగాలే కాకుండా కర్ణాటక నుండి కూడా 100 పారా మిలటరీ బలగాలను హైదరాబాద్ రప్పించారు. ఇప్పటికే అజిత్ సింగ్, శరద్ పవార్ తాము తెలంగాణాకు అనుకూలమేనని ఇప్పటికే స్పష్టం చేశారు. ఇక మిగిలినవారితో కూడా చర్చించి స్పష్టమైన వైఖరిని ప్రకటించాలని కాంగ్రెస్ భావిస్తున్నది. ఏది ఏమైనా తెలంగాణ ప్రకటన మరో 24 గంటల్లో వెలువడుతుందనే కథనాలు బలంగా వినిపిస్తున్నాయి.