తిరుమలేశుని దర్శనం నిలిపివేత

Posted: 04/24/2013 09:08 AM IST

రేపు చంద్రగ్రహణం సంభవించనుంది.  ఈ సందర్భంగా తిరుమల వేంకటేశ్వరుని దర్శనం భక్తులకు 17 గంటలపాటు ఉండదు. 

రేపు సాయంత్రం 5 గంటల నుండి శుక్రవారం 3 గంటల వరకు చంద్రగ్రహణ కారణంగా తిరుమల వేంకటేశ్వరుని ఆలయాన్ని మూసివేస్తున్నామని తిరుమల తిరుపతి దేవస్థానం ప్రకటించింది.  అందుకోసం గురువారం మధ్యాహ్నం 1.30 నుండి శుక్రవారం ఉదయం 9 గంటల వరకు స్వామి దర్శనాన్ని నిలిపివేస్తున్నారు. 

ఆగమ శాస్త్ర ప్రకారం గ్రహణ వేళల్లో ఆలయాన్ని మూసివేయటం, గ్రహణం విడిచిన తర్వాత సంప్రోక్షణానంతరం తిరగి సేవలను నిర్వహించటం ఆనవాయితీ కాబట్టి దక్షిణ భారత ఆలయాలన్నిటిలోనూ ఈ పద్ధతిని అనుసరిస్తారు.

అయితే ఈ గ్రహణకాలాలు యోగంలోనూ శాక్తేయంలోనూ ఫలప్రదమైన ఘడియలుగా అనుసరిస్తారు.

శ్రీకాళహస్తిలో స్వామివారికి అమ్మవారికి అర్ధరాత్రి సమయంలో గ్రహణకాల అభిషేకాలను నిర్వహించటానికి గాను గురువారం అర్ధరాత్రి 12.30 కి ఆలయాన్ని తెరుస్తారు.  1.45 కి గ్రహణాకాల అభిషేకాలను చేసి గ్రహణ గండాలకు స్వస్తి పలుకుతారు. 

-శ్రీజ