బెంగళూరు భాజపా కార్యాలయం సమీపంలో పేలుడు

Posted: 04/17/2013 01:08 PM IST

బెంగళూరులో మల్లేశ్వరం ప్రాంతంలో ఉన్న భారతీయ జనతా పార్టీ కార్యాలయం ముందు బాంబు పేలుడు సంభవించింది.  మోటార్ సైకిల్ ని ఉపయోగించి పేల్చినట్టుగా భావిస్తున్న ఈ పేలుడులో 13 మంది గాయపడ్డారు.  అందులో 8 మంది పోలీసులు ఉన్నారు. గాయపడినవారిలో ఇద్దరి పరిస్థితి విషమంగా ఉన్నట్టు వార్త.  ఈ ఘటనలో వాహనాలు ధ్వంసమయ్యాయి కానీ భాజపా కార్యాలయంలో నష్టమేమీ జరగలేదు.  నగర కేంద్రానికి 8 కిలోమీటర్ల దూరంలో జనసమర్దంతో రద్దీగా ఉండే మల్లేశ్వరంలో భాజపా కార్యాలయం ఉంది. 

ఘటనా స్థలి పోలీసుల ఆధీనంలో ఉంది.  బాంబు స్కాడ్ తనిఖీలు నిర్వహిస్తోంది.  ఈ ఘటనకు సంబంధించి ఏమైనా చెప్పదలచుకుంటే మేమే ప్రకటిస్తామని, ఎటువంటి పుకార్లనూ పట్టించుకోవద్దని, బెంగళూరు నగరంలో శాంతిభద్రతలను కోరుకుంటున్నామని పోలీసులు ప్రకటించారు.  ఉగ్రవాద దిశగా ఇంకా ఆధారాలేమీ లభించలేదు. 

-శ్రీజ