Posted: 03/21/2013 10:33 AM IST

రహదారిలో రాకపోకలను అడ్డుకుంటున్న తెరాస శాసనసభ్యులను పోలీసులు అరెస్ట్ చెయ్యటంతో ఆలంపూర్ లో ఉద్రిక్త వాతావరణం నెలకొంది.  ఆందోళనలో పాల్గొంటున్న విద్యార్థులు పోలీసు వాహనాల మీద రాళ్ళు రువ్వి అద్దాలను ధ్వంసం చేసారు.  

సడక్ బంద్ ని పర్యవేక్షించేందుకు అక్కడికి చేరుకున్న తెలంగాణా కార్యాచరణ సమితి ఛైర్మన్ కోదండరామ్ ను పోలీసులు అరెస్ట్ చేసారు.  శాంతియుతంగా ఆందోళన చేస్తుంటే బైండోవర్ కేసులు పెడతారా అంటూ మీడియా ప్రతినిధుల సమక్షంలో ప్రభుత్వాన్ని నిలదీస్తున్న సమయంలోనే కోదండరామ్ ని అరెస్ట్ చెయ్యటం జరిగింది.

ఆలంపూర్ లో సడక్ బంద్ లో పాల్గొంటున్న సిపిఐ నాయకులను కూడా పోలీసులు అరెస్ట్ చేసారు.  మహబూబ్ నగర్ జిల్లాలో అన్నారం దగ్గర ఆందోళన చేస్తున్న తెరాస నాయకుడు కెటిఆర్ అతని అనుచరులు 20 మంది కార్యకర్తలను పోలీసులు అరెస్ట్ చేసారు.  

తెరాస నాయకుడు హరీష్ రావు పాలమాకుల దగ్గర సడక్ బంద్ కార్యక్రమంలో పాల్గొన్నారు.

ఈ అరెస్ట్ లు అక్రమమని, అరెస్ట్ చేసిన నాయకులను వెంటనే విడుదల చెయ్యాలని తెరాస అధినేత కె చంద్రశేఖరరావు డిమాండ్ చేసారు.

 

-శ్రీజ