Posted: 01/28/2013 11:54 AM IST

తెలంగాణ రాష్ట్ర ఏర్పాటుపై కేంద్ర హోంశాఖ స్పందించింది. ఈ అంశంపై తేల్చడానికి మరికొంత సమయం కావాలని కేంద్ర హోంశాఖ ప్రకటించింది. ఇవాళ ఆ శాఖా మంత్రి సుశీల్ కుమార్ షిండే ఒక పత్రికా ప్రకటన విడుదల చేశారు. తెలంగాణ అంశంపై తుది నిర్ణయం తీసుకోవడానికి మరికొంత సమయం అవసరం అవుతుందని ఆయన ప్రకటనలో పేర్కొన్నారు. తెలంగాణపై చర్చలు ప్రారంభమయ్యాయని ఆయన సెలవిచ్చారు. రాష్ట్ర వ్యవహారాల ఇన్‌ఛార్జీ గులాంనబీ ఆజాద్ పాడిన పాటనే షిండే పాడారు. తెలంగాణపై సంప్రతింపుల ప్రక్రియ కొనసాగుతోందని, మూడు ప్రాంతాల నేతలు, సీఎం, పీసీసీ చీఫ్‌లతో చర్చలు జరుపుతామని పేర్కొన్నారు. నిర్థిష్టమైన కాలపరిమితి లేనప్పటికి వీలైనంత త్వరగా చర్చలు పూర్తి చేస్తామని ఆయన స్పష్టం చేశారు. నెల రోజుల గడువు పెట్టినప్పటికీ ఇంకా చర్చల ప్రక్రియ పూర్తి కాలేదని తెలిపారు. సంప్రతింపులు జరుగుతున్నందున నిర్ణయానికి రావడానికి మరికొంత సమయం పడుతుందని షిండే అన్నారు.