Posted: 12/15/2012 10:05 AM IST

మనదేశ వాణిజ్య రాజధానిగా పేరు ప్రఖ్యాతలు సాధించిన ముంబై నగరం ప్రపంచంలోనే చెడ్డపేరును తెచ్చుకుంది. ఎందులో అంటారా ? చెత్తలో... అవును 40 ప్రపంచ పర్యాటక దేశాలను పరిగణలోకి తీసుకొని ట్రిప్ అడ్వైజన్ అనే సంస్థ జరిపిన సర్వేలో ఈ విషయం బయటపడింది. ప్రపంచంలో అత్యంత సౌకర్యవంతంగా విహరించి, ఎటువంటి ఇబ్బందులు ఎదుర్కోకుండా ఉండే విభాగంలో అట్టడుగును నిలవడమే కాకుండా, పరిశుభ్ర వీధుల విభాగంలో చిట్టచివరి ర్యాంకుతో సరిపెట్టుకుంది. ముంబై వీధులు చెత్త చెదారంతో నిండి ఉంటాయని ఆ సంస్థ తెలిపింది. ఇక పర్యాటకులు అంత్యంత సౌకర్యవంతంగా విహరించే నగరంలో మొదటి స్థానం స్విట్జర్లాండ్‌లోని జూరిచ్ నగరం  సంపాదించింది.

జపాన్ రాజధాని టోక్యో వివిధ విభాగాల్లో తొలి స్థానాన్ని అలంకరించింది. అత్యంత పేలవ షాపింగ్ అనుభవం, అత్యంత దురుసు ప్రవర్తనగల స్థానికులు వంటి విభాగాల్లో రష్యా రాజధాని మాస్కో చివరి స్థానంలో నిలిచింది. ఏ విషయంలో సర్వే చేసిన మనదేశం చివరిలో ఉండటం చాలా కామన్ అయిపోయింది. మరి ఈ సర్వే ఫలితాలు చూసైనా, ముంబై మున్సిపాలిటీ అధికారులు, మహారాష్ట్ర సర్కారు మేల్కొంటుందో చూడాలి.