Posted: 10/18/2012 12:28 PM IST

రాష్ట్రవ్యాప్తంగా దుకాణాల్ని రాత్రి 8.30 గంటల తర్వాత తెరిచి ఉంచితే కఠినచర్యలు తీసుకుంటామని కార్మికశాఖ హెచ్చరించింది. అలాగే సెలవు దినాల్లోనూ షాపులను మూసివేయాలని సూచించింది. ఈ మేరకు కార్మిక శాఖ కమిషనర్ రామాంజనేయులు ఒక పత్రికా ప్రకటనను విడుదల చేశారు. దుకాణ సంస్థల చట్టం-1988, సెక్షన్ 7, 12 ప్రకారం షాపులను ఉదయం 8.30 నుంచి రాత్రి 8.30 గంటల వరకే తెరిచి వ్యాపారం చేసుకోవాలని సూచించారు.కార్మికులతో 8 గంటలకు మించి పనిని చేయించుకోవద్దని, అదనపు పనిగంటలకు రెండింతల వేతనాన్ని చెల్లించాలని ఆదేశించారు. షాపులు నిబంధనలను పాటించడం లేదన్న ఫిర్యాదులపై 30 బృందాలతో ఈ నెల 13 నుంచి దాడులను నిర్వహిస్తున్నామని, నిబంధనలను పాటించని హైదరాబాద్‌లోని సుమారు 253 దుకాణాలపై కేసులను నమోదు చేసినట్లు తెలిపారు. విశాఖపట్నంలో 127 కేసులు, శ్రీకాకుళంలో 64 కేసులు, రంగారెడ్డి జోన్‌లో 56 కేసులను నమోదు చేసినట్లు వివరించారు.