Posted: 10/01/2012 11:56 AM IST

మంత్రి పసుపులేటి బాలరాజు ప్రయాణిస్తున్న కారుకు త్రుటిలో పెద్ద ప్రమాదం తప్పింది. కారు డ్రైవర్ చాకచక్యంతో వ్యవహరించడంతో ఈ ప్రమాదం నుంచి ఆయనతోపాటు భార్య, వ్యక్తిగత సిబ్బంది క్షేమంగా బయటపడ్డారు. వి శాఖ ఏజెన్సీలోని పాడేరులో పర్యటనను ముగించుకున్న మంత్రి బాలరాజు భార్య రాధాకుమారి, పీఆర్వో రమణ తదితరులతో కలిసి కారులో నర్సీపట్నం బయలుదేరారు. ఘాట్ దిగిన తర్వాత మాడుగుల మండలం వీరవల్లి అగ్రహారం పరిధిలో మంత్రి ప్రయాణిస్తున్న స్కార్పియో ఒక్కసారిగా కుదుపులకు గురై అటూఇటూ ఊగడం ప్రారంభించింది. ప్రమాదాన్ని పసిగట్టిన డ్రైవర్ వెంటనే వేగాన్ని తగ్గించాడు. కానీ అప్పటికే కారు వెనుక ఇరుసు విరిగిపోయి ఎడమవైపు చక్రం ఊడిపోయింది. ఫర్లాంగు దూరం వెళ్లి రోడ్డు పక్కన చిన్నదిబ్బపై వాహనం ఆగింది. ఆ తర్వాత కాన్వాయ్‌లో ఉన్న మంత్రి సొంతకారు తేగా అందులో మంత్రి, ఆయన భార్య నర్సీపట్నం వెళ్లారు.