Posted: 08/07/2012 12:13 PM IST

మాజీ మంత్రి గాలిజనార్ధన్ రెడ్డి వర్గం మరిన్ని చిక్కుల్లో ఇరుక్కుంటోంది. బెయిల్ కేసులో కంప్లి ఎమ్మెల్యే సురేష్ బాబును ఇప్పటికే అదుపులోకి తీసుకున్న ఆంధ్రప్రదేశ్ ఏసీబీ పోలీసులు తాజాగా కర్ణాటక పాలసమాఖ్య అధ్యక్షుడు ఎమ్మెల్యే గాలి సోమశేఖర్‌రెడ్డిని కూడా అరెస్టు చేశారు. శ్రీరాములు సూచన మేరకే గాలికి బెయిల్ కోసం ప్రయత్నించామని ఎమ్మెల్యే సురేష్‌బాబు ఏసీబీ పోలీసులకు ఇచ్చిన స్టేట్‌మెంట్‌లో పేర్కొనడంతో ఈ ఉచ్చు మాజీ మంత్రి శ్రీరాములు మెడకు కూడా చుట్టుకోవచ్చునని కుటుంబీకులు తీవ్ర ఆందోళన చెందుతున్నారు. సురేష్‌బాబుతో ఏసిబి పోలీసులు బలవంతంగా ఇలా శ్రీరాములు పేరు చెప్పించి ఉండవచ్చునని బళ్ళారి ఎంపీ జె.శాంత పేర్కొన్న సంగతి ఈ సందర్భంగా గమనార్హం. మొత్తానికి ఒకే కుటుంబానికి చెందిన ముగ్గురు సీనియర్ నేతలు జైలు పాలు కావడంతో బళ్ళారిలోని గాలి మద్దతుదారుల్లో ఆందోళన ప్రారంభమైంది. గాలి జనార్దన్ రెడ్డి జైల్లో ఉన్నప్పటికీ ఆయన కుటుంబాన్ని కంటికి రెప్పలా కాపాడుతున్న సోమశేఖర్‌రెడ్డి, సురేష్‌బాబు కూడా అదేబాట పట్టడంతో వీరి ఆందోళన మరింతగా పెరిగింది.