Posted: 07/14/2012 11:42 AM IST

 మెదక్ జిల్లా సిద్దిపేటలోని ఓ ఇంజనీరింగ్ కళాశాలలో చిరుత పులులు సంచరించడం స్థానికంగా కలకలం రేపింది. సిద్దిపేటకు మూడు కిలోమీటర్ల దూరంలో ఉన్న పొన్నాలలోని ఇందూర్‌ ఇంజనీరింగ్ కళాశాలలో ఈ ఘటన చోటుచేసుకుంది. ఈ తెల్లవారుఝామున నాలుగు గంటల ప్రాంతంలో రెండు కూనలతోపాటు ఓ చిరుతపులి కళాశాల ప్రాంగణంలో సంచరించిందని... చిరుత జాడను మొదటిగా కుక్కలు పసిగట్టాయని వెంటనే కాలేజీ యాజమాన్యానికి సమాచారం అందించినట్లు స్థానికులు తెలిపారు. సమాచారం అందుకున్న ఫారెస్ట్ అధికారులు చిరుత పాదముద్రల నమూనాను సేకరించారు. దీనిపై ఉన్నతాధికారులకు నివేదిక పంపిస్తామని, ఎవరికైనా చిరుత కనిపిస్తే దానికి ప్రాణహాని కల్పించొద్దని విజ్ఞప్తి చేశారు.