Posted: 06/12/2012 02:55 PM IST

ప్రముఖులు గీసిన చిత్రాలకు భలే డిమాండ్ ఉంటుంది. పికాసో గీసిన చిత్రాలకైతే ఎంత డిమాండ్ ఉంటుందో చెప్పలేం. కానీ ఇక్కడ వచ్చిరానీ ఇంగ్లీష్ లో 1816వ సంవత్సరంలో నెపోలియన్ రాసిన ఓ అరుదైన లేఖ కోట్లు కురిపించింది! వాటర్‌లూ యుద్ధంలో ఓడిపోయిన తర్వాత శత్రువుల చెరలో ఉండగా ఆయన రాసిన ఈ ఉత్తరాన్ని తాజాగా పారిస్‌లోని ఒసెనాట్ అనే సంస్థ వేలం వేయగా ఏకంగా రూ.2 కోట్ల ధరకు అమ్ముడుపోయింది. హోరాహోరీ పోటీలో ‘ఫ్రెంచ్ మ్యూజియం ఆఫ్ లెటర్స్ అండ్ మాన్యూస్క్రిప్ట్’ ఈ భారీ మొత్తాన్ని వెచ్చించి లేఖను సొంతం చేసుకుంది.

యుద్ధంలో ఓటమి తర్వాత దక్షిణ అట్లాంటిక్ ద్వీపంలోని సెయింట్ హెలీనాలో ఖైదీగా ఉండగా 1816, మార్చి 9న నెపోలియన్.. ఈ ఒక పేజీ ఉత్తరాన్ని రాశారు. ఆ సమయంలో ఆయన ఇంగ్లిష్ నేర్చుకుంటుండటంతో వచ్చీరాని భాషలో లేఖను పూర్తిచేశారు. లెటర్ చివరన ‘‘ఉదయం 4 గంటలు’’ అని ఉండడంతో నెపోలియన్ ఈ ఉత్తరాన్ని నిద్ర మత్తులో రాసి ఉండొచ్చని భావిస్తున్నారు. నెపోలియన్ ఇంగ్లిషులో రాసిన లేఖలు మూడు మాత్రమే ఉన్నాయి. 1821లో సెయింట్ హెలీనాలోనే తన 51వ ఏటా నెపోలియన్ మరణించారు.