Posted: 05/26/2012 12:03 PM IST

కుటుంబ నియంత్రణ కోసం ఇన్నాళ్లూ పురుషులకు వ్యాసెక్టమీ, స్త్రీలకు ట్యూబెక్టమీ చేసేవారు. పురుషులు కండోమ్‌లు, స్త్రీలు గర్భనిరోధక మాత్రలు కూడా వాడేవారు. అయితే ఇకపై గర్భనిరోధక మాత్రలు పురుషులకూ అందుబాటులోకి రానున్నాయి. ఈ మేరకు స్కాట్లాండ్ శాస్త్రవేత్తలు ఎలుకల్లో ఆరోగ్యవంతమైన పురుషబీజకణోత్పత్తి తుదిదశలో కీలక పాత్ర పోషించే కట్నాల్-1 అనే జన్యువును గుర్తించారు. ఈ జన్యువును అడ్డుకునే ఔషధాన్ని తయారుచేస్తే గర్భనిరోధం తేలికని, ఈ కిటుకును మనుషులకూ వర్తింపజేస్తే కుటుంబ నియంత్రణ సులువని తెలిపారు. వాస్తవానికి తాము మగ ఎలుకల్లో వంధ్యత్వ నివారణ మార్గాలను కనుగొనేందుకు జన్యుకోడ్‌ను మారుస్తుండగా కట్నాల్-1ను గుర్తించామని పేర్కొన్నారు. కట్నాల్-1లో పురుషబీజకణోత్పత్తిలో కీలక పాత్ర పోషించే ప్రొటీన్‌ను పోలిన నమూనా ఉందని, ఆ ప్రొటీన్ లేకుండా పురుషబీజకణాలు పూర్తిస్థాయిలో అభివృద్ధికావని, వాటిని శరీరం విడుదల చేయదని వివరించారు.