Posted: 05/08/2012 06:23 PM IST

సూరిని హత్య చేయడానికి రెండు రోజుల ముందు బంజారాహిల్స్‌లోని ఒక పేరొందిన పబ్‌లో నానా హంగామా చేసినట్లు తెలిసింది. ఫ్యాక్షన్‌ నేత మద్దెలచెర్వు సూరి హత్యకేసు ప్రధాన నిందితుడు భాను కిరణ్‌ వ్యవహారంలో విస్మయం గొలిపే పలు అంశాలు వెలుగులోకి వస్తున్నాయి. అంతేగాక నగర శివార్లలోని నిర్మానుష్య ప్రదేశంలో తన 'ఫైరింగ్‌' నైపుణ్యాన్ని పరీక్షించుకున్నాడు. సూరిని చంపేందుకు సిద్ధమయ్యే ముందు నాటు (దేశవాళీ) తుపాకీని ఉపయోగించి సాధన చేశానని ప్రస్తుతం సిఐడి అధికార్ల దర్యాప్తులో ఉన్న భాను వారితో చెప్పాడు. శంషాబాద్‌ వద్ద శివార్లలోని నిర్మానుష్య ప్రదేశంలో సుమారు ఐదు రౌండ్ల కాల్పులు జరిపినట్లు అధికార్లు చెప్పారు. అయితే, వరుస కాల్పుల కోసం నాటు తుపాకులపై ఆధారపడలేరని, మొదటి రౌండ్‌కే ఇవి వేడెక్కిపోతాయని, రెండవ రౌండ్‌ అంతగా విజయవంతం కాకపోవచ్చని, అందుకే సూరిని చంపేందుకు భాను అసలైన ఆయుధాన్ని ఉపయోగించాడని దర్యాప్తు అధికారి ఒకరు పేర్కొన్నారు.

భాను వద్ద దేశవాళీ రకం తుపాకులు తొమ్మిది వరకూ ఉన్నాయని, వాటిలో ఒక దానితో తన నైపుణ్యాన్ని పరీక్షించుకుని, అసలైన దానితో సూరిని చంపాడని అన్నారు. ఫైరింగ్‌ నైపుణ్యాన్ని పరీక్షించుకునే సమయంలో భాను వెంట సినీ నిర్మాత సింగనమల రమేష్‌తో పాటు సినీ పరిశ్రమకు చెందిన కొందరు వ్యక్తులున్నారని సమాచారం. సూరిని చంపే ముందు బంజారాహిల్స్‌లోని టచ్‌ పబ్‌ వద్ద పార్టీ చేసుకున్నట్లు భాను దర్యాప్తు బృందానికి చెప్పాడు. ఆ రోజుల్లో భాను చాలా విలాసంగా గడిపాడని, హత్యానంతరం ప్రయివేట్‌ ఉద్యోగినంటూ ఢిల్లీలోని శర్మ లాడ్జిలో బస చేశాడని అధికార్లు చెప్పారు. మాజీ ముఖ్యమంత్రి వైఎస్‌ రాజశేఖరరెడ్డి మరణానంతరం సూరి పేరిట అనంతపురం జిల్లాలో రూ.25 లక్షల వరకూ ఖర్చు చేసినట్లు కూడా అధికార్లకు భాను చెప్పాడు. రియల్‌ ఎస్టేట్‌ డెవలపర్లకు భారీ ప్రాజెక్ట్‌లను ఇప్పించినందుకు గాను భానుకు వచ్చిన భారీ మొత్తాల్ని కడప ఎంపీ వైఎస్‌ జగన్మోహన్‌ రెడ్డికి సన్నిహితులైన మంగలి కృష్ణ, శ్రీనివాస్‌ అనే వారితో పంచుకున్నట్లు చెప్పాడు.