Posted: 05/07/2012 01:13 PM IST

ప్రథమ ప్రధాని పండిట్ జవహర్‌లాల్ నెహ్రూ ముందు తలవంచని గుజరాత్ రాష్ట్రం సోనియాముందు మోకరిల్లదని ఘాటుగా అన్నారు. నెహ్రూతో పోల్చుకుంటే సోనియా స్థాయి ఎంత అని విమర్శించారు. గుజరాత్ ముఖ్యమంత్రి నరేంద్రమోడీ తనదైన మార్కు వ్యాఖ్యలతో కాంగ్రెస్ పార్టీ అధినేత్రి సోనియాగాంధీపై విరుచుకుపడ్డారు. మరోవైపు దేశ ప్రధాని మన్మోహన్ సింగ్ పైనా వ్యంగ్యాస్త్రాలు విసిరారు. ప్రధాని కార్యాలయం ఇతరులు దయాదాక్షిణ్యాలతో నడుస్తోందని వాగ్బాణాలు విసిరారు. భావనగర్ జిల్లాలోని బోతాడ్ పట్టణంలో నెవడానుంచి బోతాడ్ వరకు 32 కిలోమీటర్ల నర్మదా పైప్‌లైన్‌ను జాతికి అంకితం చేసిన సందర్భంగా ఆయన ఆసక్తికర వ్యాఖ్యలు చేశారు. మేం సర్దార్ వల్లభాయ్ పటేల్ వారసులం. అందుకే ఏ రోజూ ఎవరి ముందూ తలవంచం అని మోడీ అన్నారు. గుజరాత్‌కు వ్యతిరేకంగా గతంలో ప్రథమ ప్రధాని నెహ్రూ వివక్ష ప్రదర్శించారని మోడీ ఆరోపించారు. పటేల్ సొంత రాష్ట్రం కనుకే ఆయన అలా ప్రవర్తించారన్నారు.