Posted: 05/03/2012 08:33 PM IST

వచ్చే 18 ఏళ్లలో ఆగ్నేయాసియా దేశాల కూటమి ‘ఆసియాన్’, భారత్, చైనాల సంయుక్త సంపద.. మొత్తం అమెరికా, యూరోపియన్ దేశాలను మించిపోతుందని ఆసియా అభివృద్ధి బ్యాంకు (ఏడీబీ) తెలిపింది. సవాళ్లను అధిగమించి, రిస్కులను తగ్గించుకోగలిగితే ఇది సాధ్యమేనని పేర్కొంది. 2030 నాటికి ప్రపంచ జనాభాలో సగభాగం ఆసియాన్, ఇండియా, చైనాలోనే ఉంటుందని ఏడీబీ ప్రెసిడెంట్ హరుహికో కురొడా తెలిపారు. ఏడీబీ బోర్డ్ ఆఫ్ గవర్నర్స్ 45వ వార్షిక సమావేశంలో పాల్గొన్న ఆయన.. 2012లో ఆసియా, పసిఫిక్ దేశాల జీడీపీ 6.9 శాతం మేర వృద్ధి చెందుతుందని, వచ్చే ఏడాది 7.3 శాతం పెరగొచ్చని చెప్పారు. ఈ వివరాలకు సంబంధించిన పుస్తకాన్ని బుధవారం ఆవిష్కరించారు. 2030 నాటికి చైనా అధిక ఆదాయాలు గల దేశంగా నిలుస్తుందని, ఆసియాన్ (థాయ్‌లాండ్, ఇండొనేసియా తదితర దేశాలు), భారత్ దానికి సమీపంలో ఉంటాయని కురొడా చెప్పారు.