Posted: 05/02/2012 09:35 PM IST

తపాలా శాఖ బ్యాంకింగ్‌లోకి అడుగుపెడుతోంది. పోస్ట్ బ్యాంక్ ఆఫ్ ఇండియా పేరుతో ఏర్పాటు చేయనున్న బ్యాంకు కోసం ప్రణాళికను సిద్ధం చేసేందుకు కన్సల్టెంట్‌ను నియమించే సన్నాహాల్లో తపాలా శాఖ ఉంది. ఇప్పటికే బ్యాంకు ఏర్పాటుకు సంబంధించిన సాధ్యాసాధ్యాల అధ్యయనం తపాలా శాఖ పూర్తి చేసినట్టుగా తెలిసింది. పూర్తి స్థాయి బ్యాంకు ఏర్పాటు కోసం ప్రభుత్వం నుంచి, రిజర్వ్ బ్యాంకు నుంచి అనుమతుల కోసం తపాలా శాఖ ప్రయత్నిస్తున్నట్టు తెలిసింది.

కన్సల్టెంట్ ఎంపిక కోసం దేశ, విదేశీ సంస్థల నుంచి దరఖాస్తులను ఆహ్వానించారు. బ్యాంకు ఏర్పాటుకు అవసరమైన ఇన్వెస్ట్‌మెంట్స్, బ్యాంకు సంస్థాగత నిర్మాణం, తపాలా కార్యాలయాలతో బ్యాంకుకు ఉండే సంబంధాలు.. వగైరా అంశాలపై కన్సల్టెన్సీ సంస్థ నివేదిక రూపొందిస్తుంది. గ్రామీణ ప్రాంతాలను ప్రత్యేకంగా దృష్టిలో ఉంచుకుని పోస్ట్ బ్యాంక్ ఆఫ్ ఇండియా సేవలను అందిస్తుంది. తపాలా శాఖకు ఈ బ్యాంకు వల్ల అదనపు రాబడి సమకూరే అవకాశం ఉంద. తపాలా శాఖ ప్రస్తుతం తన నెట్‌వర్క్‌లోని 1.54 లక్షల తపాలా కార్యాలయాల ద్వారా చిన్నతరహా పొదుపు మొత్తాల పథకాలను నిర్వహిస్తోంది. దాదాపు 25 కోట్ల మంది ఖాతాదారులున్నారు. పోస్టాఫీస్ సేవింగ్స్ బ్యాంకు స్కీమ్‌ను కూడా త పాలా శాఖ నిర్వహిస్తోంది.