Posted: 05/01/2012 07:46 PM IST

ముఖ్యమంత్రి క్యాంపు కార్యాలయంలో నిన్న సాయంత్రం జరిగిన పీసీసీ సమన్వయ కమిటీ భేటీలో కాంగ్రెస్ రాష్ట్ర వ్యవహారాల ఇన్‌చార్జి గులాంనబీ ఆజాద్ ఏకంగా సీఎం సీట్లో కూర్చోవడం పార్టీ వర్గాల్లో పెను చర్చకు దారి తీసింది. ఆజాద్ తీరును సొంత పార్టీ నేతలే తీవ్రంగా తప్పుపడుతున్నారు. ఇన్‌చార్జిగా వచ్చిన ఆయన సీఎం సీట్లో కూర్చోవడమేమిటని వారు ప్రశ్నిస్తున్నారు. సీఎంగా పనిచేసిన అనుభవం కూడా ఉన్న ఆజాద్, ఆ సీటుకున్న గౌరవమేమిటో తెలియనట్టుగా వ్యవహరించడం శోచనీయమంటున్నారు.

అసలు పీసీసీ భేటీని క్యాంప్ కార్యాలయంలో నిర్వహించడంపైనా కాంగ్రెస్‌లో తీవ్ర వ్యతిరేకత వ్యక్తమవుతోంది. ‘‘సమన్వయ కమిటీ భేటీ పార్టీ అత్యున్నత స్థాయి సమావేశం. అలాంటి కార్యక్రమాన్ని గాంధీభవన్‌లో నిర్వహించడం ఆనవాయితీ. పార్టీ చరిత్రలో ఇప్పటిదాకా జరిగిన సమన్వయ కమిటీ సమావేశాలన్నీ గాంధీభవన్‌లోనే జరిగాయి’’ అని కాంగ్రెస్ సీనియర్ నేత, మాజీ మంత్రి ఒకరు పేర్కొన్నారు. ఆజాద్ ఆధ్వర్యంలో కూడా ఇటీవల రెండుసార్లు ఈ కమిటీ గాంధీభవన్‌లోనే భేటీ అయిందని ఆయన గుర్తు చేశారు. ఈసారి మాత్రం క్యాంపు కార్యాలయంలో నిర్వహించడంలో ఔచిత్యమేంటో తెలియడం లేదన్నారు. బహుశా రాష్ట్రంపై ఇప్పటికే పూర్తి పెత్తనం చెలాయిస్తున్న ఢిల్లీ పెద్దలు, తామేం చేసినా చెల్లుబాటు అవుతుందనే భావనలో ఉన్నారని వ్యాఖ్యానించారు.