Posted: 04/26/2012 09:28 PM IST

               సర్కార్ ఎక్స్‌ప్రెస్‌లో పెద్దమొత్తంలో అక్రమంగా రవాణా చేస్తున్న గంజాయిని గుంటూరు జిల్లా తెనాలి రైల్వే పోలీసులు స్వాధీనం చేసుకున్నారు. 5బ్యాగుల్లో రవాణా అవుతున్న 55 కిలోల గంజాయి విలువ సుమారు 10లక్షల రూపాయల వరకు ఉంటుందని అంచనా. దీనికి సంబంధించి ఇవాళ (గురువారం) రైల్వే స్టేషన్‌లో ఏర్పాటు చేసిన విలేకరుల సమావేశంలో ఆయన వివరాలు వెల్లడించారు.
               కాకినాడ నుండి చెన్నై ఎగ్మోర్ వెళ్లే సర్కార్ ఎక్స్‌ప్రెస్‌లోని కోచ్ నెం-8లో 10 నెంబరు బెర్తు కింద అనుమానాస్పదంగా ఉన్న 5బ్యాగులను కుటుంబ సభ్యులతో కలిసి చెన్నై వెళ్లేందుకు నిడదవోలులో రైలు ఎక్కిన నాగమణి అనే ప్రయాణీకురాలు తమ బెర్తు కింద బ్యాగులు ఉండటం గుర్తించింది. తొలుత ఇతర ప్రయాణీకులవని భావించినప్పటికీ ఎంతకీ బ్యాగు యజమానులు రాకపోవడంతో అనుమానం వచ్చి ఎస్కార్ట్ పోలీసులకు సమాచారం అందించింది. ఐదు బ్యాగుల క్లిప్పులకు తాళాలు వేసి ఉండటంతో ఎస్కార్ట్ సిబ్బంది జీఆర్పీ సిఐ రమేష్‌బాబుకు సమాచారం అందించారు. రైలు తెనాలి చేరుకుంటున్నదని తెలుసుకున్న రైల్వే సిఐ రమేష్‌బాబు స్థానిక పోలీసులను అప్రమత్తం చేశారు.
                రాత్రి 10గంటల 45 నిముషాలకు సర్కార్ ఎక్స్‌ప్రెస్ ఐదో నెంబరు ఫ్లాట్ ఫాం మీదకు చేరుకోగానే బోగీలోని ఐదు బ్యాగులను స్వాధీనం చేసుకున్నారు. బ్యాగులో పరిశీలించగా ఒక్కో పాలిదిన్ కవర్‌లో రెండు కిలోల చొప్పున ప్యాక్ చేసి ఉంచిన 55 కిలోల ఎక్స్‌పోర్ట్ క్వాలిటీ గంజాయిని గుర్తించారు. బ్యాగులకు సంబందించిన వ్యక్తులు ఎవరూ అక్కడ తారసపడకపోవటం విశేషం.

...avnk