Posted: 04/26/2012 01:10 PM IST

మద్దెల చెఱువు సూరి హత్య కేసులో ప్రధాన నిందుతుడు భాను కిరణ్ తో హోంమంత్రి సబితా ఇంద్రారెడ్డి కొడుకు సంబంధం ఉందని, వారిద్దరి కలిసి అనేక చోట్ల భూ దందాలు చేశారని అనేక రాజకీయ పార్టీలు ఆరోపిస్తున్న విషయం తెలిసిందే. అయితే ఈ విషయం పై హోమంత్రి సబితా కూడా వివరణ ఇచ్చారు. తన కొడుక్కి సంబంధం ఉంటే వెంటనే సీఐడీ విచారణ చేపిస్తానని కూడా అన్నారు. కానీ టీడీపీ చంద్రబాబు నాయుడు పదే పదే గొగ్గోలు పెడూతూ ఉన్నాడు. ఈ విషయం పై ఓ పెళ్ళికి హాజరైన హోంమంత్రి కుమారుడు కార్తీక్ రెడ్డి స్పందించారు.

భాను ఎవరో తనకు తెలియదని, అతడిని ఎక్కడా కలవలేదని హోంమంత్రి సబిత తనయుడు కార్తీక్‌రెడ్డి చెప్పారు. సూరి హత్యతో తనకు లింకేంటని ఆయన ప్రశ్నించారు. సూరి, భానులలో ఎవరూ రంగారెడ్డి జిల్లాకు చెందినవారు కాదని, వారితో తనకు పరిచయం కూడా లేదని అన్నారు.  ఈ కేసులో తనకు సంబంధం ఉన్నట్టు ఎలాంటి ఆధారాలు లేవని సీనియర్ పోలీసు అధికారి రమణమూర్తి ఇప్పటికే తేల్చిచెప్పారని కార్తీక్‌రెడ్డి గుర్తు చేశారు. అయినా టీడీపీ అధినేత చంద్రబాబు జిల్లాకు వచ్చిన ప్రతిసారీ తనను అప్రతిష్ఠపాలు చేయాలని చూస్తున్నారని ఆగ్రహం వ్యక్తం చేశారు.