Posted: 03/03/2012 03:42 PM IST

నిన్న శాసనమండలిలో కాంగ్రెస్ సభ్యుడు పొంగులేటి సుధాకరరెడ్డి, తెలుగుదేశం పార్టీ సభ్యుడు దాడి వీరభద్రరావు మధ్య జరిగిన వాదోపవాదాలు వ్యక్తిగత ధూషణలవరకూ దారితీసాయి. నువు నోర్ముయ్ అంటూ తిట్టుకునేవరకూ వచ్చింది. అంతవరకూ దారితీయటానికి ముందు పొంగులేటి, దాడి కూడా ఏడు కొండలను స్మరించుకున్నారు.

తితిదే సొమ్ము మీద కన్నేసినందువలనే అలిపిరి ఘటన జరిగిందని పొంగులేటి అనగా, ఏడు కొండలు కాదు రెండే కొండలన్నందుకే దేవుడు తీసుకెళ్ళిపోయాడని దాడి అన్నారు. అలిపిరి లో చంద్రబాబు నాయుడి కారు బాంబు దాడికి గురైందన్న విషయాన్ని పొంగులేటి గుర్తుచేస్తే, నాకు ఏడు కొండలు కాదు రెండే కొండలని వైయస్ఆర్ అన్న మాటలను దాడి గుర్తు చేసారు.

ఇంకా వెనక్కి పోతే, పాఠ్యపుస్తకాలను విద్యార్థినులకు అందించేందుకు తిరుమల తిరుపతి దేవస్థానం సొమ్మును వినియోగించటాన్ని ప్రశ్నోత్తరాల సమయంలో ప్రతిపక్ష ఎమ్మెల్సీలు అడగగా, దేవాదాయ శాఖ మంత్రి రామచంద్రయ్య దానికి సమాధానం చెప్పటం, పొంగులేటి సమర్థిస్తూ మాట్లాడటం జరిగింది. భక్తుల డబ్బును ప్రభుత్వ పథకాలకు వాడుకోవటమేమిటని దాడి వీరభద్రరావు ప్రశ్నించగా, మొత్తం తితిదే సొమ్ము మీదనే కన్ను వేయబట్టే అలిపిరిలో ఆ సంఘటన జరిగిందని పొంగులేటి వ్యాఖ్యానించగా దాడి వీరభద్రరావు ఆగ్రహాన్ని వెలిబుచ్చుతూ వైయస్ ఆర్ ని దేవుడు మొత్తానికే తీసుకునిపోయాడని అన్నారు.

ఆ విధంగానైనా చట్టసభల్లో ఏడుకొండలు, ఏడుకొండలవాడూ చర్చల్లో చోటుచేసుకున్నారు.