Posted: 02/18/2012 11:45 AM IST

ఓబుళాపురం అక్రమ తవ్వకాల కేసులో నిందితులుగా విచారణనెదుర్కుంటున్న ఐఎఎస్ శ్రీలక్ష్మి, అప్పటి డైరెక్టర్ గా వ్యవహరించిన రాజగోపాల్ లు జగన్ అక్రమాస్తుల కేసులో కూడా విచారణకు కూడా ఉపయోగపడతారని, వారిని విచారించటానికి అనుమతి కావాలని సిబిఐ కోర్టుని కోరగా, శ్రీలక్ష్మి తరఫు న్యాయవాది వి సురేందర్ రావు వారిని సాక్షిగా పిలుస్తున్నారా లేక నిందితులుగానా అని అడిగిన దానికి, విచారణ జరిగితే కానీ వాళ్ళు సాక్షులో నిందితులో చెప్పలేమని సిబిఐ తరఫు న్యాయవాది బి.రవీంద్రనాథ్ అన్నారు.

మరి ఎలాంటి పత్రాలనూ సమర్పించకుండా విచారిస్తాననటం సరికాదు కదా అని సురేందర్ రావు అన్నదానికి, ప్రస్తుతం దర్యాప్తులో ఉండటం వలన కేసుకి సంబంధించి ఎటువంటి పత్రాలనూ సమర్పించటం కుదరదని రవీంద్రనాథ్ అన్నారు. దర్యాప్తు సంస్థని వారి దగ్గరున్న ఆధారాలను చూపమనటం కూడా సరికాదు కాని, దొరికినవారిని అన్ని దర్యాప్తులకూ వాడుకుంటామనటం కూడా సరికాదని శ్రీలక్ష్మి తరఫునుంచి భావిస్తున్నారు. నోటీసులు జారీ చెయ్యకుండా నేరుగా వచ్చి కోర్టుని అడగటమేమిటని సిబిఐ ధోరణిని తప్పుపట్టారు.

వాదోపవాదాలను విన్న సిబిఐ ప్రత్యేక న్యాయస్థానం శ్రీలక్ష్మి విషయంలో విచారణను ఫిబ్రవరి 21 కి, రాజగోపాల్ విషయంలో ఫిబ్రవరి 22కి వాయిదా వేసింది.

-శ్రీజ