Posted: 02/10/2012 03:41 PM IST

ప్రభుత్వంతో పాటు స్వచ్ఛంద సంస్థలు, మీడియా ఎంతగా చైతన్యవంతం చేస్తున్నా ఆడబిడ్డలపై కొందరి ఆలోచనా విధానం మారటంలేదు. ప్రస్తుత సమాజంలో ఆడపిల్ల ఏరంగంలోనూ తీసిపోకుండా ముందుకు దూసుకెళ్తున్నాకానీ వీరు కళ్లు తెరుచుకోవటంలేదు. ఆడబిడ్డైనా, మగబిడ్డైనా ఒకటే నన్న ఇంగిత బుద్ధిని మరిచి సభ్యసమాజం తలదించుకునే వికార చేష్టలకు తెగబడుతున్నారీ మూర్ఖశిఖామణులు.

ఇవాళ విశాఖపట్నం జిల్లాలోని ఆనందపురం మండలం దత్తంగలో ఇలాంటిదే ఓ దారుణం జరిగింది. రెండోసారి ఆడపిల్ల పుట్టిందని కట్టుకున్న భార్యకు నిప్పుపెట్టాడో కర్కోటకుడు. మహిళ కేజీహెచ్‌ ఆసుపత్రిలో చికిత్స పొందుతూ మృతిచెందింది. ఇద్దరు పిల్లలు ఆనాథలయ్యారు.

మరో దారుణమైన సంఘటన ఒకటి ఖమ్మం జిల్లాలో నేడు చోటు చేసుకుంది. నవమాసాలూ మోసి, కని, పెంచిన సాక్షాత్తూ అమ్మనే పొట్టనబెట్టుకున్నాడో..... జిల్లాలోని అర్బన్ మండలం జగ్యాతండాలో ఓ కసాయి కొడకు కన్నతల్లిని దారుణంగా కొట్టి చంపాడు. సమాచారం అందిన వెంటనే పోలీసులు అక్కడకు చేరుకుని మృతదేహాన్ని స్వాధీనం చేసుకున్నారు. కేసు నమోదు చేసి విచారణ చేపట్టారు.

ఇదిలా ఉంటే.. మరో అరాచక సంఘటన ఆలస్యంగా వెలుగులోకి వచ్చింది. చెన్నైలో పాఠశాల టీచర్‌ను దారుణంగా విద్యార్థి కత్తితో పొడిచి హత్య చేశాడు 9వ తరగతి చదువుతున్న టీనేజ్‌ విద్యార్థి. పారిస్‌ కార్నర్‌ సమీపంలోని ఆర్మేనియన్‌ వీధిలోని సెయింట్‌ మేరీస్‌ ఆంగ్లో ఇండియన్‌ హైయర్‌ సెకండరీ స్కూల్‌లో ఈ ఘటన జరిగింది.

హతురాలు ఉపాధ్యాయురాలు ఉమామహేశ్వరి (40) గత 10 ఏళ్లుగా ఇదే పాఠశాలలో విజ్ఞానశాస్త్రం బోధిస్తోంది. పాఠశాల గదిలో ఒంటరిగా ఉన్న తరుణంలో విద్యార్థి కత్తితో ప్రవేశించి ఆమె గొంతు కోసి పొట్టలో పొడిచి హత్యచేశాడని పోలీసులు చెబుతున్నారు. ఈ అఘాయిత్యానికి పాల్పడ్డ విద్యార్థి వయసు 15 ఏళ్లని, పేరు మొహమ్మద్‌ ఇర్ఫాన్‌ అని తెలుస్తోంది. ఇర్ఫాన్‌ను టీచర్‌ తిట్టడం వల్లే ఈ దాడి చేశాడని సమాచారం.

…avnk