Posted: 02/07/2012 11:17 AM IST

కొత్తగా ప్రమాణస్వీకారం చేసి మంత్రివర్గంలో చేరిన మంత్రులలో ఉత్తమ కుమార్ రెడ్డి గృహనిర్మాణ శాఖ, గడ్డం ప్రసాద కుమార్ కి చేనేత జౌళి శాఖ, కొండ్రు మురళికి వైద్యవిద్య, ఆరోగ్య, 104, 108 లను కట్టబెట్టారు. కన్నా లక్ష్మీనారాయణకు వ్యవసాయ శాఖను కేటాయించగా మిగిలిన మంత్రుల శాఖలు యథాతధమని ప్రకటించారు. కాస్తంత అలకలు, బుజ్జగింపులు మామూలే కాబట్టి వాటికి సిద్ధంగానే ఉన్న ముఖ్యమంత్రి వారిని సముచితంగా సమాధానపరచారు. ఉప సభాపతి గా వ్యవహరిస్తున్న భట్టీ విక్రమార్క కు మంత్రి పదవి ఇవ్వవచ్చన్న ఊహాగానాలకు తెరపడింది. ఆ పని చేస్తే మళ్ళీ ఉపసభాపతి ఎన్నికలు చేపట్టవలసివస్తుందని, అందులో చాలా చిక్కులున్నాయని ముఖ్యమంత్రి భట్టీ విక్రమార్కకు సవివరంగా తెలియజేసినట్టు సమాచారం.

అయితే, శాఖలను కత్తిరించినందుకు డిఎల్ ముందు ప్రశాంతంగానే తన బరువు తగ్గించటానికే ముఖ్యమంత్రి వైద్యవిద్య, ఆరోగ్యశ్రీలను తప్పించుంటారని అన్నా, ఆ తర్వాత మాత్రం నిప్పులు చెరిగారు. తనెవరికీ చెంచాగిరీ చెయ్యవలసిన అవసరం లేదని, కడప ఉప ఎన్నికలను ముఖ్యమంత్రే స్వయంగా చూసుకుంటారని, తనను ఆయా శాఖలనుంచి తప్పించటానికి తన అసమర్థతే కారణమని అనుకుంటే తనకసలీ మంత్రి పదవే అవసరం లేదని డిఎల్ రవీంద్ర ఘాటుగా స్పందించారు.

మంత్రి పదవి చేపట్టిన ఉత్తమ కుమార్ రెడ్డి మాత్రం తను రాష్ట్ర మంత్రిగా తెలంగాణా వాదాన్ని వినిపిస్తానని, పేదల ఇళ్ళ నిర్మాణంలో సేవచేస్తానని, జానారెడ్డి కి అనుకూలంగా ప్రవర్తిస్తానని అంటున్నారు.

-శ్రీజ