Posted: 01/31/2012 02:21 PM IST

శరీరంలో గాలి, నీరు, భూమి, అగ్ని, ఆకాశ తత్వాలనే పంచభూతాలుంటాయని అందరికీ తెలుసు. వాటిలో మన ప్రమేయంతో తీసుకునేది నీరే. శ్వాస ప్రక్రియ అసంకల్పితంగానే జరిగిపోతుంది. మనం తీసుకునే ఆహారం వలన మిగిలిన భూతాలకు కావాలసిన వాటా అందుతుంది. కానీ నీరు మాత్రం మనంతట మనం విధిగా తీసుకోవలసిందే. తిన్న ఆహారంలోంచి విడుదల్లే నీరు మన శరీరానికి సరిపోదు కాబట్టి నీటిని మనం సేవిస్తూ ఉంటాం. ఉష్ణ్రోగ్రత ఎక్కువగా ఉండే ప్రాంతాల్లోనైతే నీరు తాగటం చాలా అవసరమవుతుంది. నీటి శాతం పడిపోతే డీ హైడ్రేషన్ వచ్చి ప్రాణాంతకమౌతుందని అందరికీ తెలుసు. కానీ పని ఒత్తిడిలో కాసేపటి తర్వాత తాగుదాంలే ఏమవుతుంది అని ఉపేక్షిస్తుంటారు.

నీటి శాతం బాగా పడిపోతే డీ హైడ్రేషన్ మన దృష్టికి వస్తుంది కానీ డీ హైడ్రేషన్ ప్రారంభమవగానే దాని తాలూకు చిహ్నాలు మన శరీరంలో పొడసూపుతాయి. అవి తల నొప్పి, విసుగు చెందటం లాంటి లక్షణాలను కలిగిస్తుంది.

మనకు దాహం వేస్తోంది అంటే అప్పటికే డీ హైడ్రేషన్ మొదలైందన్నమాట. అందుకే ఎండలో ప్రయాణం చేస్తున్నప్పుడు, ఎండాకాలంలో ఇంట్లనే ఉన్నా సరే, దాహం వేసేంతవరకూ ఆగకుండా అప్పుడప్పుడూ మధ్యే మధ్యే పానీయం సమర్పయామి అన్నట్టు ఉదకాన్ని తీసుకుంటుంటే డీ హైడ్రేషన్ బారిన పడకుండా ఉంటారు.

ఈ విషయంలో కొంతమందిచేత ట్రెడ్ మిల్ మీద వ్యాయమం చేయించి వారి శారీరక స్థితిని నమోదు చేసి పరిశీలించిన తర్వాత, భోజన సమయంలో నే కాక అప్పుడప్పుడూ నీరు తాగటం అవసరమని కనెటికట్ విశ్వవిద్యాలయం పరిశోధకుడు ఆమ్ స్ట్రాంగ్ తెలియజేసారు.

-శ్రీజ