Posted: 01/19/2012 10:51 AM IST

ఈరోజు రాష్ట్ర మంత్రి వర్గ విస్తరణలో ప్రజారాజ్యం పార్టీకి చెందిన గంటా శ్రీనివాసరావు, సి.రామచంద్రయ్యలు మంత్రివర్గంలోకి రాబోతున్నారు. 11.45 కి రాజ్ భవన్ లో జరగనున్న ప్రమాణ స్వీకారానికి హాజరవటానికి వీరిద్దరు నేతలు ముందుగా చిరంజీవి నివాసానికి చేరుకున్నారు. అక్కడి నుండి అందరూ కలిసి రాజ్ భవన్ కి వస్తారు.

తమకు ఇచ్చిన ఈ అవకాశానికి ఇద్దరు నేతలూ సోనియాగాంధీ, చిరంజీవి, ముఖ్యమంత్రి కిరణ్ కుమార్ రెడ్డి లకు కృతఙతలు తెలియజేస్తూ, కాంగ్రెస్ పార్టీలో అంకితభావంతో పనిచేస్తూ పార్టీని మరింత బలోపేతం చెయ్యటానికి కృషిచేస్తామన్నారు.

వీరిద్దరితోపాటు తెలంగాణా ప్రాంతానికి చెందినవారి నుంచి మరో ముగ్గురు మంత్రులను తీసుకుంటూ తన మద్దతుదారుల సంఖ్యను పెంచుకుందామనుకున్న ముఖ్యమంత్రి కిరణ్ కుమార్ యత్నం ఫలించలేదు. కాకపోతే చేనేత మంత్రిగా వ్యవహరిస్తున్న శంకరరావుని తొలగించటానికి కేంద్రం అంగీకరించింది.

తెలంగాణాకు ఇందులో కూడా అన్యాయం జరిగిందని తెలంగాణా కు చెందిన ప్రజాప్రతినిధులు వాపోతున్నారు. అయితే, పదవులకన్నా తెలంగాణా సాధనే ముఖ్యమని అంటూ సరిపెట్టుకుంటున్నారు.

చిరంజీవి సూచించినవారినే మంత్రులుగా తీసుకోవటానికి అంగీకరించటం, ప్రమాణ స్వీకారం కూడా చిరంజీవి పెట్టిన ముహూర్తానికే జరగటంతో కాంగ్రెస్ లో విలీనమైన ప్రజారాజ్యంపార్టీ నేతలు, కార్యకర్తలలో ఉత్సాహం పెల్లుబుకుతోంది.

-శ్రీజ