Posted: 01/19/2012 11:26 AM IST

పటిష్టమైన భద్రతా ఏర్పాట్ల మధ్య పాకిస్తాన్ ప్రధానమంత్రి యూసఫ్ రజా గిలానీ సుప్రీం కోర్టులో జస్టిస్ నాసిర్ ఉల్ ముల్క్ ధర్మాసనం ముందు హాజరయ్యారు. కంటెమ్ప్ట్ ఆఫ్ కోర్టు కింద నోటీసులిచ్చిన సుప్రీం కోర్టు ఆదేశాల మేరకు హాజరైన ప్రధానమంత్రి గిలానీ, తను న్యాయస్థానాలకు అత్యం గౌరవమిస్తానని, కోర్టు ఆదేశాల మేరకు జైలుశిక్షను కూడా అనుభవించిన తనకు కోర్టు ఆఙలను ఉల్లంఘించే ఆలోచనే ఎప్పుడూ రాదని అన్నారు. అయితే, ప్రపంచంలోని దేశాలన్నీ వారివారి దేశాల అధ్యక్షులకు చట్టం నుంచి రక్షణ కల్పిస్తుందని, పాకిస్తాన్ కూడా అదే క్రమంలో నడుస్తోందని, అందుకే పాక్ అధ్యక్షుడు అసిఫ్ అలీ జర్దారీ మీద ఎటువంటి విచారణకూ ఆదేశించలేదని అన్నారు.

స్విస్ బ్యాంకుల్లో అక్రమ ఆర్జనను దాచిపెట్టుకున్నట్టుగా జర్దారీ మీద లోగడ ఉన్న ఆరోపణ మీద మరోసారి ఆ కేసుని తెరిచి స్విట్జర్లాండ్ అధికారులకు లేఖ రాయమని కోర్టు ఆదేశమిచ్చినా ఆ పని చెయ్యనందుకు సుప్రీం కోర్టు గిలానీని కోర్టు ధిక్కారం కేసుకింద ఈ రోజు హాజరవవలసిందిగా ఉత్తర్వులు పంపించింది. దాన్ని గౌరవమిస్తూ గిలానీ రానయితే వచ్చారు కానీ, కోర్టుకి క్షమాపణ చెప్పే ఉద్దేశ్యం ఉన్నట్టుగా కనిపించటం లేదు.

సుప్రీం కోర్టు చుట్టూ గట్టి భద్రతను ఏర్పాటు చేస్తూ అధికారులు ప్రత్యేక మైన పాస్ లు లేకుండా ఎవరినీ అనుమతించటంలేదు. ఇతర కేసుల్లో ఈ రోజు రావలసిన వారయినా సరే, లాయర్లయినా సరే, చివరకు మీడియా వారికి కూడా ప్రత్యేక పాస్ లు జారీచేసినవారే సుప్రీం కోర్టు ఆవరణలోకి అనుమతించబడతారు. రాత్రి నుంచే ట్రాఫిక్ ఆంక్షలు కూడా విధించారు. దేశ రక్షణ శాఖ, ప్రభుత్వానికి మధ్య ఉన్న విభేదాల మూలంగా భద్రతా వ్యవస్థ అతి జాగ్రత్త తీసుకుంది.

ప్రధానమంత్రి కోర్టు ధిక్కారణ ఆరోపణలో దోషి కారనే వాదనను గిలానీ అడ్వకేట్ అయిత్జాజ్ ఎహసాన్ కోర్టులో ప్రవేశపెడుతున్నారు.

-శ్రీజ