Posted: 01/18/2012 05:43 PM IST

అభ్యంతరకరమైన అంశాలను తొలగించకపోతే గూగుల్, ఫేస్ బుక్ లు చట్టపరంగా శిక్షలకు సిద్ధం కావలసివస్తుందని ప్రెస్ కౌన్సిల్ ఆఫ్ ఇండియా ఛైర్ మన్ జస్టిస్ మార్కండేయ కట్జూ నిన్న మీడియా ప్రతినిధులతో మాట్లాడుతూ అన్నారు. సోషల్ సైట్స్ మీద నియంత్రణ అవసరమని అన్న టెలికం మంత్రి కపిల్ సిబాల్ మాటలతో తను ఏకీభవిస్తానని చెప్పిన జస్టిస్ కట్జూ, రోజుకి కొన్ని లక్షల పోస్టింగ్స్ జరుగుతున్నప్పుడు వాటిని నియంత్రించటం కష్టమని అన్న వాదనను అంగీకరించలేదు.

అంతకు ముందు ఎన్నో సందర్భాల్లో వ్యాఖ్యానించినట్టుగానే జస్టిస్ కట్జూ వార్తా పత్రికలను, మీడియా ఛానెల్స్ నూ వార్తల సేకరణ, ఎంపిక విషయంలో తప్పుపట్టారు. దేశంలో ఎన్నో సమస్యలుండగా, పేదరికం, రైతుల బలవంతపు ఆత్మహత్యలలాంటి విషయాలమీద కేంద్రీకరించకుండా ఎవరో సినిమా నటి గర్భవతి అయింది, జన్మనిచ్చింది, ఎవరో సినిమా నటుడు మరణించాడు లాంటివార్తలకు ప్రాముఖ్యతనిస్తున్నారని ఆయన ఆవేదన వ్యక్తపరచారు.

చైర్మన్ పదవినలంకరించినప్పటి నుంచీ మీడియా ప్రక్షాళన దిశగా ఆత్రుత చూపిస్తున్న జస్టిస్ కట్జూ, తనని నియంతలా అందరూ భావిస్తున్నరని, నిదానంగా తనెవరో కౌన్సిల్ సభ్యులందరికీ అర్థమౌతుందని, ఒకవేళ తన ప్రతిపాదనలకు అందరూ ఒప్పుకోకపోతే ప్రజాస్వామ్య పద్ధతిలో మెజారిటీ చూస్తామనీ అన్నారు.

అయితే, ఇండియన్ రియాల్టీ షో బిగ్ బాస్ 5 లో భాగం వహించిన సన్నీ లియోన్ విషయంలో ఏమీ చెయ్యలేమని అనేసారు. సన్నీ లియోన్ రియాల్టీ షో ద్వారా తన వ్యక్తిగతంగా నడుపుతున్న ప్రోనో వెబ్ సైట్ ని అభివృద్ధి చేసుకుంటోందని ఇండియన్ బ్రాడ్ కాస్టింగ్ ఫౌండేషన్ స్థాపించిన స్వచ్ఛంద సంస్థ బిసిసిసి కి ఎన్నో ఫిర్యాదులందుతున్నాయి. ఆమె వెబ్ సైట్ హోం పేజ్ లోనే, బిగ్ బాస్ 5 లో ఆమెను చూసినట్టుగానే, ఆమె వివస్త్రకావటాన్ని కనులారా కాంచండి అంటూ ప్రకటన వస్తోందని ఫిర్యాదులు వచ్చాయి. అయినా మనదేశంలో ఆమె మన సమాజ నియమాలను ఉల్లంఘించే పనులేమీ చెయ్యలేదు కనుక ఆమెను సమాజంలో వెలివెయ్యలేం అన్నారు జస్టిస్ కట్జూ.

-శ్రీజ