Posted: 01/18/2012 05:06 PM IST

ముఖ్యమంత్రి కిరణ్ కుమార్ రెడ్డి ప్రయత్నం ఫలించింది. ఢిల్లీ యాత్రను క్షేమంగా ముగించుకుని లాభంగా తిరిగివస్తున్నారు. ఏమిటా లాభమంటే మంత్రి వర్గ విస్తరణకు అధిష్టానం పచ్చజెండా చూపించింది. ఇదేం లాభమని అంటే, మరి ఆయన అడిగిందదే కాబట్టి లభించిన వరాలూ అవే. దేవుడి దగ్గరికిపోయి షర్ట్ బటన్ ఊడిపోయింది నాకో బటన్ ఇవ్వమని అడిగితే సరేనని దేవుడైనా ఇచ్చేది బటన్ మాత్రమే. మా రాష్ట్రంలో ఈ సమస్యలున్నాయి, వాటికి ఈ పరిష్కారమార్గం బావుంటుందని నేను అనుకుంటున్నాను, మీరేమంటారు, మీరెంతవరక మద్దతునివ్వగలరు అని అడిగితే అది వేరేలా ఉండేదేమో. కానీ, రానున్న ఎన్నికల్లో పార్టీని బలోపేతం చేసుకోవాలంటే జనం లోకి పోవాలి, జనంలోకి పోవాలంటే పథకాలుండాలి. పథకాలు ప్రవేశపెట్టాలంటే వాటికి మద్దతునిచ్చే మంత్రిమండలుండాలి. మద్దతునివ్వాలంటే అక్కడ నా వాళ్ళుండాలి కాబట్టి మంత్రి వర్గ ప్రక్షాళన చేసుకుంటేనే కానీ వీలవని పనులవన్నీ అందువలన నా మంత్రి వర్గ విస్తరణకు నాకు అనుమతినివ్వమని అన్నప్పుడు ఆ పర్యటన లాభదాయకమైందీ అని అంటే అధిష్టానం అందుకు ఒప్పుకోవటం జరిగింది.

ప్రజారాజ్యం పార్టీలోని చిరంజీవి సూచించినవారికి రెండు స్థానాలు, తెలంగాణా మంత్రులకు మూడు స్థానాలకు మొత్తం ఐదుగురిని అదనంగా మంత్రివర్గంలోకి తీసుకోవటానికి, ఇంకా ఉన్న మంత్రి వర్గాన్ని ప్రక్షాళన చెయ్యటానికి కూడా ఆమోదాన్నందుకున్నారు కిరణ్ కుమార్. ఆజాద్ తోనూ ఆ తర్వాత సోనియా గాంధీతోనూ భేటీ అయిన కిరణ్ కుమార్ తను అనుకున్నది సాధించుకుని వచ్చారు. ఎవరూ తన మాట సరిగ్గా వినటం లేదు అని ఆరోపిస్తున్న కిరణ్ కుమార్ రెడ్డి చేతికి ఇప్పుడో బెత్తం వచ్చినట్టే. ఎందుకంటే మంత్రి వర్గ విస్తరణతో పాటు ఎవరినైనా తీసివెయ్యటం కానీ, పదవుల్లో మార్పులు చెయ్యటం కానీ చెయ్యవచ్చు. ఇక ఆయన దగ్గరికి క్యూ కడతారనటంలో అతిశయోక్తి లేదు.

-శ్రీజ