Posted: 12/21/2011 10:38 AM IST

రోజురోజుకీ చెత్త పెద్ద సమస్య అయిపోతోంది.  చెత్త వలన అనేక సమస్యలు ఎదుర్కోవలసి వస్తుంది.  చెత్త ఉన్న చోట దోమలు పెరగటానికి అనువైన స్థలాలుగా మారుతుంటాయి.  నీళ్ళల్లో పడితే నీటి కాలుష్యం.  ఈ చెత్త బాధ నగరాల్లో మరీ ఎక్కువగా ఉంటుంది.  తక్కువ జాగాలో ఎక్కువమంది నివాసం ఉండటం మూలంగా సహజంగానే చెత్త ఎక్కువగా పేరుకుపోతుంది.  ఈ బాధనుండి తప్పించుకోవటానికి రెండే మార్గాలు.  చెత్తను పూర్తిగా కాల్చిపడేయాలి, లేదా కంపోస్ట్ లు తయారు చేసి ఎరువులుగా వాడాలి.  ఈ రెండు పనులకూ పెద్ద ఎత్తున ఏర్పాట్లుండాలి. 

నిన్న ఢిల్లీలో పర్యాటక శాఖ ఆధ్వర్యంలో జరిగిన క్లీన్ ఇండియా కార్యక్రమంలో ప్రముఖ శాస్త్రవేత్త, మాజీ రాష్ట్రపతి అబ్దుల్ కలాం మాట్లాడుతూ, చెత్తలో నుంచి విద్యుత్తు ఉత్పాదన చెయ్యవచ్చని దాని ద్వారా రెండు సమస్యలకు పరిష్కారం లభిస్తుందని అన్నారు.  ఇటు చెత్త నుండి విముక్తితో పాటు విద్యుత్తు ఎద్దడి కూడా తగ్గిపోతందని చెప్పారు.  కాంగ్రెస్ నాయకుడిగా మెగాస్టార్ చిరంజీవి,  హిందీ నటుడు శత్రుఘ్నసిన్హా తదితరులు పాల్కొన్న ఈ కార్యక్రమంలో అబ్దుల్ కలాం మినీ విద్యుత్తు కేంద్రాల గురించి వివరించారు.  పర్యాటక శాఖ ప్రోత్సాహంతో బ్యాంక్ ల సహాయంతో పట్టణ ప్రాంతాల్లో చెత్త నుంచి ఉత్పాదన చేసే మినీ విద్యుత్తు కేంద్రాలను నెలకొల్పటం వలన చెత్త వలన వచ్చే నష్టాలు, ప్రయాసలు, కాలుష్యాలు తగ్గిపోవటమే కాకుండా విద్యుత్ కొరత తీరటమే కాకుండా ఫ్లైయాష్ కూడా ఉపయోగపడుతుందని ఆయన అన్నారు. ఫ్లైయాష్ భవన నిర్మాణంలోనూ వ్యవసాయంలోనూ ఉపయోగపడుతుంది. ఇప్పటికే 50 వేల మంది ఫ్లైయాష్ వలన ఉపాధి పొందుతున్నారని కూడా కలాం తెలియజేసారు. 

-శ్రీజ