Posted: 12/20/2011 09:55 AM IST

అత్యంత కఠిన నియమాలు ఉన్న శబరిమల అయ్యప్పస్వామి ఆయయంలో అపచారం జరిగింది. శబరిమల ఆలయంలోకి మనరాష్ట్రానికి చెందిన సరస్వతి అనే మహిళ ప్రవేశిచింది. ఈ ఆలయంలోకి ప్రవేశించిన మహిళలలో ఈమె రెండవ ఆమె. మన రాష్ట్రానికి చెందిన 35 ఏళ్ల సరస్వతి అనే మహిళ సోమవారం 18 మెట్లు ఎక్కి ఆలయంలోకి వెళ్లి స్వామిని దర్శించుకున్నారు. సోమవారం మధ్యాహ్న సమయంలో ఆలయంలోకి ప్రవేశించిన ఆమె స్వామికి పూజలు కూడా చేశారు. అయ్యప్ప ఆలయంలోకి పదేళ్ల నుంచి 50 ఏళ్ల మధ్య వయసున్న మహిళలకు ప్రవేశార్హత లేదు. అయినా.. సరస్వతి ప్రవేశించడంతో దాన్ని ఆలయపూజారులు అపచారంగా భావించారు.

దీంతో ఆలయాన్ని, 18 మెట్లను కడిగి ప్రధాన ఆలయాన్ని కూడా శుద్ధి చేసినట్లు ఆలయ యంత్రాంగం తెలిపింది. ప్రధాన పూజారి ఈ శుద్ధి కార్యక్రమాన్ని నిర్వహించారని ట్రావన్‌కోర్ దేవస్వం బోర్డు అధికారులు వివరించారు. సరస్వతి ప్రధాన ఆలయంలో పూజలు చేసుకుని, తర్వాత మల్లికాపురం ఉపాలయానికి వెళ్తుండగా ర్యాపిడ్ యాక్షన్ ఫోర్స్ సిబ్బంది ఆమెను గుర్తించ పట్టుకున్నారు. వారు ఆమెను స్థానిక పోలీసులకు అప్పగించారు.

గతంలో కన్నడ సినీ నటి జయమాల తాను యుక్తవయసులో ఉండగా శబరిమల ఆలయంలోకి ప్రవేశించి, స్వామి విగ్రహాన్ని ముట్టుకున్నట్లు కన్నడ నటి జయమాల 2006లో ప్రకటించి సంచలనం సృష్టించారు. దాంతో ఆమెపై కేసు నమోదు చేసిన పోలీసులు.. గత సంవత్సరమే కోర్టులో చార్జిషీటు కూడా దాఖలు చేశారు. ఈ పిటిషన్‌పై కేరళ హైకోర్టు గత సంవత్సరం అక్టోబర్‌లో స్టే విధించింది. ఇలా నిషేదం ఉన్న ఆలయాలలోకి మహిళలు ప్రవేశించి అపవిత్రం చేయకూడదని అయ్యప్ప భక్తులు కోరుతున్నారు.